Jeksenbi, 28 qazan 2012 0:07
Bul ómirde ózgermeıtin bir aqıqat bar. Eldiń erteńin oılasaq, ol bizdiń búgingi qam-qareketterimizge baılanysty bolady. Qazirgi jasalyp jatqan ulan-ǵaıyr ári jasampaz isterdiń mańyzy men maǵynasy da eldiń keleshektegi taǵdyryna qatysty aıqyndalady.
Týǵan elimiz Qazaqstannyń óz táýelsizdigine shyn máninde ıe bolǵan 13 jylda ekonomıkalyq tabystarǵa, saıası damý deńgeıine jáne adamǵa eń qymbat rýhanı qundylyqtarǵa qol jetkizgenimizdi aýyz toltyryp aıta alamyz. Bári de kóz aldymyzda ótip jatty emes pe. Ashynyń kermek dámi shyǵady, tushynyń tátti dámi bolady.
Jeksenbi, 28 qazan 2012 0:07
Bul ómirde ózgermeıtin bir aqıqat bar. Eldiń erteńin oılasaq, ol bizdiń búgingi qam-qareketterimizge baılanysty bolady. Qazirgi jasalyp jatqan ulan-ǵaıyr ári jasampaz isterdiń mańyzy men maǵynasy da eldiń keleshektegi taǵdyryna qatysty aıqyndalady.
Týǵan elimiz Qazaqstannyń óz táýelsizdigine shyn máninde ıe bolǵan 13 jylda ekonomıkalyq tabystarǵa, saıası damý deńgeıine jáne adamǵa eń qymbat rýhanı qundylyqtarǵa qol jetkizgenimizdi aýyz toltyryp aıta alamyz. Bári de kóz aldymyzda ótip jatty emes pe. Ashynyń kermek dámi shyǵady, tushynyń tátti dámi bolady. Tarazy basynda biz qandaı memleket bolamyz, qandaı joldy tańdap alamyz degen ómirlik máni zor suraq turǵanda bárimiz de kóp oılanyp, kóp tolǵandyq. Sol taǵdyrly kezeńderde Qazaqstannyń tuńǵysh Prezıdenti Nursultan Nazarbaevtyń álem damýynyń tamyryn tap basyp, jeke basynyń aqyl-oıy men erik-jigeri, alysty boljaı alatyn saıasaty arqasynda jáne óz halqynyń jappaı qoldaýymen ósken eldiń bıigine kóterildik.
Bul búgingi kúnniń shyndyǵy. О́tkendi Qudaı da ózgerte almaıdy degen sóz bar. Bizdiń merzim ólshemmen az, atqarylǵan istiń mólsherimen ǵasyrǵa bergisiz tirligimizdiń baǵasyn bolashaq beredi. Mine, osy tarıhı taǵylymdy qarapaıym halyq ta, saıasatkerler de, kózi ashyq, kókiregi oıaý azamattar da jadynan shyǵarmaýy tıis.
Dál qazir Qazaqstannyń mańdaıy jarqyrap tursa, oǵan kimder uıytqy boldy, kimder tirek boldy degen suraqqa halyq qol jetkizgen tabystar men ıgilikter turǵysynda jaýap beretinine senemin. Taqyr jerden esh memleket qabyrǵaly elge aınalmaıdy. Halyqaralyq qaýymdastyqtan abyroı-bedelge ıe bolý da ekiniń biriniń qolynan kelmeıtin kúrdeli másele. Men muny ádeıi aıtyp otyrmyn.Tek táýelsizdik jyldary ǵana Qazaqstandy jer-jahan tanyp, abyroıymyz asty. Qazaq degen ulttyń bar ekenin, sol ulttyń ataýynda keń-baıtaq jerge ıe Qazaqstan degen memlekettiń bar ekenin bildi. Nursultan Nazarbaev tárizdi zamanyn izdegen azamattyń kóregendiligi men parasattylyǵy, qoǵamdy toptastyrýdaǵy qabilettiligi osynaý sheshýshi kezeńde erekshe tarıhı ról atqardy jáne atqaryp keledi. Eger tanymaldyqty anyqtaý sıpatynda “Elińde kimiń bar” degen álemdik suraq týa qalsa, Elbasynyń iri qaıratkerlik tulǵasyn atap, maqtanyshpen jaýap qatý eldik ónegesi bolar edi. Bul bile bilsek, baǵa jetkisiz ulttyq abyroı, aıryqsha memlekettik mártebe.
Meniń qarııalyq bul sózimniń dárejesi qandaılyq ekenin bilgińiz kelse, aınalańyzǵa bir qarap kórińizshi. Arǵy-bergi tarıhty paraqtap jáne bir baıqańyz. Alash – Alash bolǵaly beri órkenıetti memleket bolýymyzdyń bastaýy qaıda turǵanyn qınalmaı-aq tabasyz.
Biz tilekshil adambyz. Bul ómirden kórgenimiz de kóp. Túıgenimiz de az emes. Keshegi KSRO tusynda respýblıka úkimetin 14 jyl basqarǵan adam qoǵam men qoǵamnyń aıyrmashylyǵyn, tarıh dońǵalaǵynyń qaıda tartyp bara jatqanyn, memleket qurýdyń mánisin, bılik pen halyq arasyndaǵy baılanystyń baǵyt-baǵdaryn, salmaǵyn bir kisideı shamalaı alatyn shyǵar dep oılaımyn. Táýbeshil de halyqpyz ǵoı. Barǵa qanaǵat jasaımyz, joqqa júırik jetpeıdi dep te qoıamyz. Ahmet Baıtursynov aıtqanyndaı, qazaq joǵyn izdegen halyq. Al ótken ǵasyrlarda joǵalǵan nárse bizde az ba? Táýelsizdiktiń tizgini óz qolymyzǵa tıgende beıne bir qýǵynshydaı joǵaltqan nársemizdiń bárin taýyp, joǵymyzdyń bárin tez túgendep alǵymyz kelgeni ras. Tarıh tolqynynda qym-qýyt ózgerister men saıası dúrbeleń keıde osynyń bárin ıelene qalýymyzǵa múmkindik te bermeıdi. Bul zańdylyq. Oǵan moıynsunbaı tura almaısyń. Soǵan qaramastan, Allataǵala bergen Qazaqstannyń jer asty ken qazbalaryn ıgerý arqyly ekonomıkalyq damýymyzdyń qazanyna túsetin baılyqty taptyq. Ol kúnnen-kúnge molaıyp keledi. Qazaqstannyń munaıy men astyǵy qazir kóz tiktirer negizgi ekonomıkalyq tirek bolyp otyr. Al endi etek jaýyp, es jıyp, qaz-qaz tura bastaǵan shaqta naryq zańynyń talaptaryna sáıkes tikeleı ınvestısııa tartý – túsingen adamǵa qııamet-qaıym tirlik. Ol úshin elde ınvestısııalyq ahýal tartymdy bolýy kerek. Basqa memlekettermen salystyrǵanda Qazaqstan bul jaǵynan kóp artyqshylyqqa ıe. О́ıtkeni, bizdiń elde saıası turaqtylyq, ulttar arasyndaǵy birlik jáne ózara túsinistik dástúrli ómir bolyp qalyptasqan. Muny búkil halyqaralyq qaýymdastyq joǵary baǵalap otyr. Almaty men Astananyń iri-iri halyqaralyq mártebeli jıyndardyń ortalyǵyna aınala bastaýynyń bir syry osynda jatyr. Bul arada el basshylyǵynyń úlken kóregendik saıasat ustanyp otyrǵanyn umytýǵa bolmaıdy. Qazaqstan halyqtary Assambleıasy sııaqty qoǵamdyq qurylym TMD elderiniń tájirıbesine engenin estip júrmin. El ishindegi ultaralyq birlikke barlyq ulttar men ulystardyń, ardagerler uıymy sııaqty qoǵamdyq birlestikterdiń qosqan úlesi de aıtýly. Tabys degende myna bir derekter kózime ottaı basylady. Jalpy ishki ónimniń turaqty damýy jaǵynan da TMD elderiniń arasynda kósh basynda turmyz, demokratııalyq jáne saıası prosester de óz erekshelikterimen damý ústinde. Demokratııa uǵymynyń aıasy da keń bolyp qalyptasyp keledi. Respýblıkamyzda qanshama úkimettik emes uıymdar, saıası partııalar men qozǵalystar, táýelsiz aqparat quraldary bar ekenin oqyrmandar menen góri jaqsy biletin shyǵar. Áıtse de biz keıde ony tek bılik úshin talasý nemese synaý quraly dep birjaqty túsinetin sııaqtymyz. Menińshe, demokratııanyń jaqsy jaqtary kóp. Qoǵamdyq yqpal jasaý úshin de parasatty aqyl-oı kerek. Erkin oı men sóz bostandyǵy bar. Degenmen, demokratııaǵa adamdardyń ázirligi pisip-jetilmeıinshe, saıası pikirtalasta artyq-aýyz oılardyń bolýy múmkin. Derbes memleket qurý prosesinde, bizge beımálim naryqtyq qarym-qatynastar jolynda jiberilgen olqylyqtar men kemshilikterdiń de bolýy múmkin. О́mirden óz ornyn tappaǵan birli-jarym adamnyń ókpe-renishi bolýy da múmkin. Biraq halyq bárin kórip otyr. El ishinde jaǵdaıdyń jaqsarǵanyn sezingen halyq qazir qandaı bir saıası partııalardyń nemese qozǵalystardyń úndeýine ún qosyp, jeteginde keteıin dep otyrǵan joq. Jurtqa bos daýryqpa sóz emes, naqty is kerek. Osy arada bir oı keledi. Biz qol jetken tabystarymyzǵa toqmeıilsimeı, ıaǵnı bórkimizdi aspanǵa ata bermeı, ekonomıkamyzdy odan ári jaqsarta túsýdi oılastyrǵanymyz jón. О́setin eldiń túpki ıdeıasy osyny ósıet qyp ustanady.
Elbasy Nursultan Nazarbaevtyń Qazaqstan halqyna arnaǵan bıylǵy Joldaýy osy oıymyzdy nyqtap, senimimizdi kúsheıtip, úmitimizdi ushtaı túskenine kózim jetip otyr. Joldaýdyń árbir jolynda tereń maǵyna bar. Janashyrlyq kózqaras bar. Salıqaly paıym bar. Eń bastysy, elimizdiń ekonomıkasyn tek munaı baılyǵymen ǵana emes, san-salaly arnada damyta otyryp, adamdardyń áleýmettik máselelerin ońtaıly sheshýdiń jańa ıdeıalary bar. Bul tarıhı qujat maǵan Qazaqstannyń 2030 jylǵa deıingi strategııalyq damýynyń jańa bir belesti qyryn jáne ashqandaı áser etti. Jalpy, meniń bilýimshe, ekonomıkalyq jaǵdaı áleýmettik problemalardy jedel jáne úılesimdi sheshýge múmkindik berse, onda halyqtyń ómir súrý deńgeıi kóteriledi, tabysy da molaıa túsedi.О́tken tórt jyl ishindegi ekonomıkanyń ósýi eń tómengi zeınetaqy mólsherin eki ese derlik (3 myńnan 5800 teńgege deıin), ortasha zeınetaqyny da eki ese (4,1 myńnan 8,6 myń teńgege deıin), eń tómengi jalaqyny – eki jarym ese (2,6 myńnan 6,6 myń teńgege deıin), ortasha jalaqyny – 1,6 ese derlik (14,3 myńnan 24,8 myń teńgege deıin), memlekettik áleýmettik járdemaqylar mólsherin 45 paıyzǵa ósirýge múmkindik bergeni zor tabys. Osy Joldaýda Elbasy atap kórsetkendeı, áleýmettik-ekonomıkalyq tabystarymyz negizgi ólshemder boıynsha bizdiń Ortalyq Eýropanyń birqatar elderine barynsha jaqyndaı túsýimizge múmkindik berdi, al Ońtústik-Shyǵys Eýropa elderinen biz ilgerilep ketken ekenbiz. Eýropa elderiniń naryqtyq ekonomıka jolyna túskenine san ondaǵan jyldar bolǵanyn eskersek, bizdiń eldiń damý qarqyny adam súısinerlikteı emes pe. Bizdiń memleket endigi jerde orta deńgeıden joǵary tabysy bar memleketterdiń tobyna jatady. Sergek saıasatkerler men bilimdar ǵalymdar dál osy kezeńniń oń ózgeristerin úlken ǵylymı jıyndarda, ekonomıkalyq basqosýlarda jurtshylyqqa keńinen túsindirgeni abzal. Kez kelgen adam óziniń ómiriniń jaqsara túskenin sezingen saıyn alǵa qaraı umtylady. Tutyný deńgeıi jańa tilek týǵyzady. Sondyqtan da endigi jerde Qazaqstannyń álemdik qoǵamdastyqta básekege qabilettiligi týraly másele alǵa qoıylyp otyr. Bizdiń ekonomıkamyzdyń, ǵalymdardyń, menedjerlerdiń, bıznesshilerdiń, mamandardyń, jumysshylardyń básekege qabilettiligi týraly aıtylǵan.
Qoǵamdyq damýymyzdyń deńgeıi osy talapqa saı daıarlyǵy bolýyna kepildik beretin kásibı, jańa tehnologııany ıgergen biliktilikti arttyrýdyń mańyzy óte zor. Aldaǵy jyly kózdelgen mindetterdi júzege asyrý barysynda qazirgi Úkimetke, jergilikti atqarý organdaryna, árbir memlekettik mekemege, bilim ordalaryna, óndirisshilerge básekege laıyqty isterdi oryndaý, uıymdastyrý jáne qadaǵalaýda júkteletin mindetter óte aýqymdy kórindi. Munyń bárin shashaýyn shyǵarmaı, uqypty tııanaqtaý atqarý organdary úshin úlken syn. Ol úshin mınıstrler men ákimder alys, shalǵaı jatqan aýdandar men eldi mekenderge jıi baryp, qarapaıym halyqpen qoıan-qoltyq aralasyp júrgeni jón bolady. Bul oraıda olar Elbasynyń ónegesinen úırengeni abzal. Ol kisi halyqpen jıi aralasady, jurtshylyqtyń ártúrli ókilderin Astana men Almatydaǵy rezıdensııasynda jıi-jıi qabyldaıdy. Oı-tilekterin tyńdaıdy. Qundy usynystaryn júzege asyrýdy tıisti oryndarǵa tapsyryp jatady. Máselen, bizdiń Úkimet músheleri óz yqpalyn shaǵyn qalalarda, aıta qoıarlyqtaı ozyq tájirıbesi bar aýyldarda tirshilik tamyryna serpin týǵyzatyn máselelerdi qolma-qol sheshetin deńgeıge jetkizý kerek. Aýyl jyldarynda memleket tarapynan bólingen mol qarjy sonda tıimdi ári maqsatty jumsalady. Memlekettik qyzmetkerlerge halyq senimi aýadaı kerek. Halyq senimi – tabysqa bastaıtyn jáne jurtshylyqty jumylǵan judyryqtaı aýyzbirlikke yqpaldastyratyn kúsh. Myna naryq kapıtaly ártúrli talaptardy nyǵarlap jatqan kezde is kózin tabatyn jańa zamannyń menedjer mamandary, alǵyr oıly azamattar, tájirıbesi mol qyzmetkerler qalada da, aýylda da jetkilikti bolý jaǵyn kúnbe-kún oılastyrǵan abzal. Bul bilim men ǵylymdy damytýǵa tikeleı qatysty másele.
Joldaýda Indýstrııalyq-ınnovasııalyq strategııalyq damýdyń kóp jetistikteriniń ishinde meni elimizdegi alǵashqy ǵaryshtyq Jer serigi jasalýyn qarjylandyrýdy qolǵa alý máselesi qatty tebirentti. Bul úlken jetistiktiń basy bolsa kerek. О́tken jyly 5 munaı hımııa kásipornynyń jumysy qalpyna keltirilip, san myń adamǵa jumys tabylǵanyn jyly sezimmen oqydym. Aıtqandaı, Aýyl sharýashylyǵy mınıstrligi janynan Aýyldyq aýmaqtar isteri jónindegi komıtetti qurý ıdeıasy óte oryndy aıtylypty. Aýyl problemasy dál qazir aıalaýdy da, jan-jaqtan qoldap járdemdesýdi de kútedi. Menińshe, avtokólik jolyn, telefon júıesin jaqsartyp, medısınalyq qyzmettiń sapaly bolýyna memlekettik qamqorlyqtyń aıqyndalǵany jurtshylyqtyń yqylasyn arttyrady. Biz keıde aýyl dese, kedeıshilikti kóz aldymyzǵa keltiremiz. Shyn máninde solaı ma? Jurttan estýimshe jáne baspasóz betinen oqyǵanymdaı, myńǵyrtyp mal baqqan qazaq aǵaıyndar kóshten qalyp jatqan joq. Berekeli dıqandar da kóp. Adamdardyń shyraıy jaqsy. Eńsesi kóterilip te qaldy. Sharýa adamyna eń kerekti qunarly jerdi sol eginshilikpen aınalysatyn kisilerge satyp berý máselesi birinshi kezekte tursa eken deımin. Beınettiń azabyn da, tozaǵyn da kórip júrgen adamdar óz kásibiniń raqatyn zań sheńberinde de jeńildikpen paıdalanǵanyn qalaımyn. Qazir aýylda da, qalada da turmysy tómen, áleýmettik jaǵynan qorǵalýǵa jatatyn qart kisiler men otbasylar bar. Sondyqtan mundaı adamdardyń nazardan tys qalmaıtyny jóninde jasalǵan baǵdarlama da júıeli jumys bolyp keledi. Jalpy, memleket kedeıshilikke qarsy kúresti qanshalyqty pármenmen qolǵa alsa, sybaılas jemqorlyqqa qarsy kúresti odan da ári eselep kúsheıtýdi usynar edim. Ásirese, memlekettik qyzmetshiniń atyna kir juqpaýy kerek. Al kezinde memleket senim bildirgen sheneýnikter bos belbeýlik tanytsa nemese memleketshildik kózqarasynda ala-qulalyq bolsa, olarmen birge bolý bılikke abyroı ápermeıdi. Muny men qazir saıası partııalar men qozǵalystar óz elektorattaryn kóbeıtý úshin áıteýir ábigerge túskenin kórip, qarbalas týǵyzyp júrgenin sezgen soń aıtyp otyrmyn. О́mirlik fılosofııada mynadaı bir oı aıtylady. О́zgeni synaý úshin óz minińdi bil deıdi. Al bizdiń keıbir adamdar kúni keshe ǵana memlekettik bıliktiń bir bedeldi tutqasyn ustap turǵan kezde memleketshil bolyp júrse, endi óz kinásinen bılikten ketken soń kámpıtke ókpelegen baladaı burtıyp, saıasatty sýdaı sapyryp júr. Qara sýdy qansha sapyrsań da maı shyqpaıdy. Ondaı-ondaı “aıqaıshyl” adamdar kópshilik ishinde biren-saran bola beredi. Olarǵa qarap elikteýdiń de, tipti olardy eleýdiń de qajeti joq. Alǵa qaraı kóz tikken jón. Qazaqta “Baq birde aýyp, birde taýyp qonady. Aýyp qonǵany – esirtedi, taýyp qonǵany – eseıtedi” degen naqyl sóz bar. Sondaı-aq halyq “Elińdi jamandama – shyǵar tóriń, jerińdi jamandama – kirer kóriń” dep te qatqyl aıtady. Osy aqyldy sózderdi syrtqa qaraı ańsary aýyp turatyn kisiler este ustasa artyq bolmas. Saıasatkerler kelesi saılaýdy oılaıdy. Al naǵyz ultjandy qaıratkerler eldiń bolashaǵyn oılaıdy. Álbette, ulttyq qaýipsizdik úshin saıası turaqtylyq pen halyqtar dostyǵynyń myzǵymas birligi erekshe qymbat. Kez kelgen nársege jik túspeýi kerek.
Halyqqa qyzmet etý úshin bılikke aqyl toqtatqan, oń-solyn jetik tanıtyn, bilimdar, óz otbasynda úlgili azamattar kelýi kerek. Zańdy túrde tirkelgen saıası partııalardyń qoǵamdyq pikirdi qalyptastyrý, olqylyqtar men kemshilikterdi túzeý úshin yntymaqtastyqpen qyzmet etýin qoldaýymyz kerek. Alaıda birqatar saıası partııalardyń jetekshileri jáne basqa da belsendi músheleri qaladan uzap shyqpaıdy, alys aýyldarǵa nege at izin salmaıtyny tipten tańǵaldyrady. Osy jerde qoǵamda kózge oqshaý kórinetin bir máseleni aıtpaı ketýge bolmaıdy. О́zderin saıasatker sanatyna qosyp, menmendik pıǵylmen júrgender úshin bılik basynda otyrǵan azamattardy aq-qarasyn aıyrmaı, synap-mineý eń ońaı tásil bolyp barady. Biraq ol ózin-ózi aqtamaıtyn, el senbeıtin daýryqpalyq qana. “Jerden jik shyqty, eki qulaǵy tik shyqty” degendeı, bazbireýlerdiń qazirgi órkendep, damyp kele jatqan isterimizdi joqqa shyǵarýshylyq pikirleri de estilip qalýda. Demek, keıbir azamattar qyzmet berse razy, qyzmet bermese narazy bolyp shyǵa keletin bir jaman ádet taýyp alǵandaı. Bul ózi halyqtyq dástúrge de, qoǵamdyq qalypqa da syımaıdy. Ár nárseniń óz reti bolmaýshy ma edi. Aq-qarasyn ajyratyp bilmeı jatyp jazǵyrý ádepke de, ádilettilikke de jatpaıdy. Sonda bizdiń ar-uıatymyz ben qadir-qasıetimiz sol mansapqa baılanyp qalǵany ma? Beınelep aıtqanda, shash taraýy ońǵa qaraı jyǵylatyn adamnyń keıpi shashyn sol jaǵyna qaraı kúshtep jyǵa taraǵanda qandaı bolatynyn álgindeı saıasatshylar bilse, baıybyna barar edi. Az-kem kemshilikterge bola memlekettik qyzmetshilerge jappaı qara kúıe jaǵa berý de ádilettilikke jatpas edi. Árıne, keıbir jekelegen sheneýnikterdiń tóreshildigi, menmendigi, ońaı paıda tabýǵa áýestenetin jymysqylyǵy qarapaıym halyqty qynjyltady. Kóp jaǵdaıda quqyq qorǵaý organdary qyzmetkerleriniń atyna aıtylyp jatatyn ókpe-nazdardyń týýyna sebep te joq emes bolsa kerek.
Elbasynyń Joldaýynda jańa turǵyn úı saıasaty týraly aıtylǵan usynystarynyń bári de halyqqa jaǵady. Ras, óte qymbat páterlerdi qarapaıym adamdardyń satyp alý múmkindigi shekteýli. Tabysy mol adamdar qymbat úılerdi satyp alsa óz erki. Biraq qoǵam tek baı adamdardan turmaıdy. Orta taptyń da óz ortasy bar. Al áleýmettik jaǵynan qorǵalýǵa jatatyn otbasylar úshin ózimizdiń otandyq qurylys materıaldarmen salynatyn arzan úılerdiń qatary kóp bolatyny osy qujatta jaqsy aıtylypty. Úkimet te ile-shala arnaıy baǵdarlama jasap, ár oblys ákimderine qansha kólemde úı turǵyzý qajettigi kórinis taýyp otyr. Bálkim, tórt balasy bar jas otbasyna nesıe berýdiń jeńildetilgen túri engizilgeni jón shyǵar. Munyń máni tereń. Tipten jańa páter satyp alý úshin kóp balaly otbasyna nesıeni qaıtarymsyz berse de artyq emes. Demografııalyq saıasattyń túpki máni jas otbasylarda balalardyń kóp bolýyna baılanysty. Sondaı-aq medısınalyq qyzmettiń, ana men balany qorǵaýdyń aıasynda atqarylatyn kóp is-sharalarǵa da qanyqtyq. Bul qazirgi keıbir qıyn túıindi máselelerdiń birte-birte sheshiletinin ańǵartady.
Iá, Joldaýda taraý-taraý tolǵaqty máselelerdi tııanaqtap, júzege asyrý taǵy da el bolyp jumylýdy qajet etedi. Úkimettiń údeden shyǵatynyna senemin. Bizdiń damý jolyndaǵy elimizdiń múmkindigi de oǵan tolyq jetedi. Onyń bárin men taratyp aıtyp otyrǵanym joq. О́ıtkeni kózdelgen oı-josparlar qomaqty jáne buǵan deıingi mindetterdiń aýqymynan asyp túsedi. Túıindep aıtar tilegim mynadaı: halqymyz ben ultymyzdyń atpal azamattary árdaıym eli men jerin oılap júrýi kerek. Yrys-nesibesi mol adamdar yryzdyǵy ózinen artylyp jatsa, ulttyq dástúrimizge saı kórshi-qolańyna, aǵaıyn-týystaryna járdem berýi musylman qaǵıdasynda saýaby tıedi, kóńilge medet bolady deıdi. Al saıasatshynyń ustaǵan joly turlaýly, túzý bolsa, úlken ózgeristerge mindetti túrde oń yqpal etedi.
Jaqsylyqqa aqyl suraıyn deseń, halyqtan sura. Aqylshy ári naǵyz ádil synshy saıasatker emes, halyq bolady.
Adaldyqqa júgingen atam qazaq “Aýyz birligi bar el ozady”, dep bekerden-beker aıtpasa kerek. Sondyqtan osy ómirlik qaǵıda Qazaqstannyń mańdaıyn jarqyratatyn baǵa jetkisiz qundylyq ekenin bárimiz myqtap este ustaıyq. Elbasynyń bıylǵy Joldaýynda kórsetilip, júzege asyrylatyn berekeli tirlikter men salıqaly júrgizip otyrǵan memlekettik saıasaty bizdi jarqyn ómirge jeteleıtinine tolyq senemin. Biz osyǵan tilektespiz.
Báıken ÁShIMOV,Eńbek Eri.
ALMATY.
28 mamyr, 2004 jyl.