Jańadan 14 mekteptiń qurylysy júrgizilip, onyń 8-i paıdalanýǵa berilgen Túrkistan oblysy Saryaǵash aýdanynda bıyl apatty jaǵdaıdaǵy mektep máselesi sheshimin tapty.
Aýdan jyldy jańa nysandardy paıdalanýǵa berýmen bastady. Atap aıtsaq, jýyrda aýdanda 5 balabaqsha, 2 mektep, 4 medpýnkt, barlyǵy 13 nysan paıdalanýǵa berildi. Oǵan qosa Jambyl aýyl okrýgine qarasty Bekbota, Maıdabozaı, Qalǵansyr, Kópqudyq, Baıǵabyl eldi mekenderinde elektr jelileriniń jańartylǵan nysandary iske qosyldy. Jańa ashylǵan nysandardyń biri – Saryaǵash qalasynda ornalasqan №4 Iý.Gagarın mektebiniń 900 oryndyq ǵımaraty. Qurylysy 2017 jyly bastalǵan nysanǵa jalpy somasy 1 mlrd. 300 mln. teńge jumsalǵan. Jańa mekteptiń ashylý saltanatyna qatysqan oblystyq maslıhat depýtaty Ábilqasym Dosbolov, oblystyq bilim basqarmasynyń basshysy Isataı Saǵyndyqov jáne aýdan ákimi Qaırat Abdýalıev turǵyndardy quttyqtap, mekteptiń lentasyn qıdy. Sondaı-aq bul kúni Tegisshil aýylyna qarasty Mádenıet eldi mekeninde 300 oryndy M.Jumabaev atyndaǵy mektep paıdalanýǵa berildi. Jalpy aýdandaǵy 77 bilim berý mekemesiniń 57-i tıptik úlgide salynsa, yńǵaılastyrylǵan jaıda ornalasqany - 21. Paıdalanýǵa berilgen nysandardyń taǵy biri - Jańaqurylys eldi mekeninde ornalasqan 125 oryndy «Aısha apa» bóbekjaıy qurylysyna 160 mln. teńge jeke ınvestısııa tartylǵan. Jergilikti 23 adam turaqty jumyspen, ortasha 45 myń teńge jalaqymen qamtylyp otyr. Aıta ketelik, bul kúni «Nurálem», «Álitaı», «Janaıym», «Saıantaı» atty balabaqshalar da paıdalanýǵa berildi. Jalpy aýdanda 202 mektepke deıingi mekeme bar. Onyń 16-y memlekettik, 181-i jekemenshik balabaqsha jáne 5-ýi shaǵyn ortalyq. Aýdan boıynsha 1-6 jas aralyǵyndaǵy balalardyń sany 26 067 bolsa, bala-baqshalarǵa qamtylǵany – 22 545. Iаǵnı balalardyń qamtylý kórsetkishi 93,0% bolyp otyr. Sondaı-aq, «Rýhanı jańǵyrý» baǵdarlamasy aıasynda qaıta qalpyna keltirilgen, Qaplanbek oqý-sharýashylyǵyndaǵy «Er esimi – el esinde» alleıasy ashyldy. Taskesken, Mádenıet, Qursaı, Álimtaý eldi mekenderinde búgingi zaman talabyna saı salynǵan, modýldi quramaly medısınalyq pýnktter de qańtardan bastap halyqqa qyzmet kórsete bastady.
Ǵalymjan ELShIBAI,
«Egemen Qazaqstan»
Túrkistan oblysy.