Bul týraly oblys ákimdiginde ótken jınalysta belgili boldy.
«Elektrondy úkimet» damýy men memlekettik qyzmet kórsetý barysy jaıly Mańǵystaý oblysy boıynsha «Azamattarǵa arnalǵan úkimet» MK» UAQ fılıalynyń dırektory E.Baıjigit jáne Mańǵystaý oblysy ákimi apparaty basshysynyń orynbasary Á.Balmanova baıandama jasady.
- «Azamattarǵa arnalǵan úkimet» memlekettik korporasııasynyń Mańǵystaý óńiri boıynsha 11 bólimi, eki sektory jáne bir fılıaly bar. Reestr boıynsha barlyǵy 741 qyzmet túri kórsetiledi. 2018 jyly 1 377 536 memlekettik qyzmet túri kórsetilgen. Mobıldi HQO boıynsha 316 shaqyrtý jasalynyp, 6 063 qyzmet kórsetildi. Sonymen qatar, oblystyń barlyq aýdandary men qalalarynda óz-ózine qyzmet kórsetý sektorlary bar. Olar arqyly 2018 jyl ishinde jalpy somasy 61 mln teńgeni quraıtyn tranzaksııa jasalǵan. Sondaı-aq azamattarǵa ESQ arqyly, bir rettik parol, EgovKzBot Telegram boty arqyly memlekettik qyzmet alý ońtaılandyrylyp, úshinshi jaq tarapynan anyqtama alý jeńildetildi, - dedi E.Baıjigit.
Á.Balmanovanyń málimetinshe, búgingi tańda jergilikti atqarýshy organdar 195 memlekettik qyzmet túrin usynyp otyr. Elbasynyń bıýrokratııalyq prosedýralardy azaıtyp, jemqorlyqty joıý boıynsha tapsyrmasyn iske asyrý maqsatynda memlekettik qyzmet kórsetýdi 2019 jyly 80 paıyzǵa, 2020 jyly 90 paıyzǵa elektrondy formatqa kóshirý josparlanyp otyr. 2018 jyl qorytyndysyna sáıkes, jergilikti atqarýshy organdar tarapynan 147 qyzmet túri boıynsha 3 336 710 qyzmet kórsetilgen.
Byltyr memlekettik organdar tarapynan qaǵaz formatynda kórsetilgen qyzmet túri azaıyp, memlkettik korporasııa jáne elektrondy formattaǵy qyzmet kórsetý túri artqan. Máselen, 2017 jyly Memlekettik korporasııa arqyly 55 qyzmet túri kórsetilse, 2018 jyly qyzmet túri 65 deıin artqan. 2017 jyly elektrondy formatta 40 qyzmet túri kórsetilse, 2018 jyly 54 qyzmet kórsetildi. Sıfrlandyrý aıasynda jańa týǵan nárestelerdi tirkeýdiń pılottyq jobasy iske qosyldy. Nátıjesinde (M-gov) mobıldi qosymshasy arqyly 3811 ana tirkelip, 195-i týý týraly kýálik aldy, 1 032 bala balabaqshaǵa kezekke turǵyzylyp, 620 ana júktiligine jáne týýyna baılanysty járdemaqy alǵan.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy