Respýblıkalyq aqparat quraldarynda Qyzylorda qalasynda dárethana qaptaǵan úıde turyp jatqan turǵyndar jaıly habarlar berilgen edi Osyǵan baılanysty Qyzylorda qalasynyń ákimdigi jaýap berdi dep habarlaıdy «Egemen.Kz» tilshisi.
«Maqalada kórsetilgen jataqhana qala ortalyǵynda emes, qalaǵa qarasty Qyzyljarma aýyldyq okrýginde ornalasqan»,-deıdi jaýap hatta.
«Tolyǵyryq aıtqanda, Qyzyljarma aýyldyq okrýgindegi Batyrbaev kóshesi 2A meken jaıyndaǵy 5 qabatty jataqhana qurylysy 1974 jyly bastalyp 1979 jyly paıdalanýǵa berilgen. Jataqhana 1997 jyldan bastap jeke menshikke ótip ketken.
Sondyqtan, "Turǵyn úı qatynastary týraly" Zańynyń 35 baby jáne 50 babynyń 2 tarmaǵyna sáıkes, menshik ıeleri ortaq múliktiń jáne dara menshiktegi úı-jaılardyń saqtalýyna jáne qaýipsiz paıdalanýyna járdemdesýge jáne oǵan jumsalatyn shyǵystaryna qatysýǵa mindetteledi.
Osy zańǵa jáne QR Úkimetiniń «О́ńirlerdi damytýdyń 2020 jylǵa deıingi baǵdarlamasynyń» talaptaryna sáıkes, kúrdeli jóndeý jumystaryn júrgizýge menshik ıeleriniń keminde 70 paıyzynyń kelisimi bolýy kerek. Sodan keıin ǵana kúrdeli jóndeý jumystary júrgiziledi.
Alaıda, osy jataqhana turǵyndarynyń ár túrli pikirleri, bir mámilege kele almaýy saldarynan kelissóz jumystary 3 jyldan asa júrdi.
Atalǵan jataqhanany jańǵyrtý baǵdarlamasy aıasynda kúrdeli jóndeýden ótkizý boıynsha turǵyndarmen túsindirý jumystary júrgizilip, 2018 jyldyń aıaǵynda turǵyndardyń kelisimi alyndy.
Qazirgi tańda jataqhanany kúrdeli jóndeýden ótkizýge jobalyq smetalyq qujattamalary "Remproektservıs" JShS-men daıyndalýda.
Jobalyq smetalyq qujattamalary daıyn bolǵannan keıin jańǵyrtý jumystary júrgiziletin bolady.
Aıta ketý kerek, sońǵy 6 jyldyń ishinde Qyzylorda qalasy boıynsha QR Úkimetiniń «О́ńirlerdi damytýdyń 2020-shy jylǵa deıingi baǵdarlamasy» aıasynda respýblıkalyq bıýdjetten bólingen 3 mlrd. 200 mln. teńgege 115 kópqabatty turǵyn úı kúrdeli jóndeýden ótti.
Budan bólek qaıtarymdy qarajat esebinen 600 mln. teńgeden astam qarjyǵa 16 turǵyn úıge kúrdeli jóndeý júrgizildi".
Ákimdik qaıta-qaıta qozǵalǵan daýly máselege osylaı jaýap berip otyr. Jataqhana tolyq jóndeýden ótse osy taqyrypty qozǵaǵan aqparat quraldarynyń da úmiti aqtalar edi.
Baqtııar TAIJAN,
«Egemen Qazaqstan»
Qyzylorda oblysy.