Jańaqorǵan aýdanynda jas jubaılar Núrken men Aınur Janazarovtar ózderine syıǵa berilgen qarjyny qaıyrymdylyq maqsatqa jumsady. Olar meshitke kelip, áleýmettik jaǵynan az qamtylǵan otbasylarǵa tegin azyq-túlik úlestirdi.
- Úılený toıy ómirimizdegi eń úlken qýanysh, - deıdi Núrken. - Dostarymyz toıǵa 250 myń teńge jınap berdi. Ol qarjyǵa lımýzın jaldap, qurby-qurdaspen emen-jarqyn bir kún toılaýǵa bolar edi. Alaıda, biz otbasylyq ómirimizdiń alǵashqy aq paraǵyn qaıyrymdylyqpen bastaǵymyz keldi. Sadaǵa - saýapty isterge bastaıdy. Búginde taǵdyr talqysyna túsip, qınalyp júrgen jandardyń janynan tabylsań úlken saýapqa qalasyń ári ómirleriniń jaqsyǵa ózgerýine sál de bolsa septigiń tıedi. Osyndaı nıetimiz bar ekenin dostarymyzǵa bildirip edik, olar qýana qoldady. Biz muny at shyǵarý nemese maqtan úshin emes, júrek qalaýymyzben jasadyq. Bir kúngi toı qyzyǵy eshteńe sheshpeıdi. Biz osyndaı qadamymyz arqyly basqa da jas jubaılardy oılandyrǵymyz keledi.
Janazarovtardyń oıy - osy. Qaıyrymdylyq - qazaqtyń qanyna ana sútimen sińgen qasıet. Alaıda, keńestik urda-jyq zaman lebi osyndaı ıgi dástúrdi umyttyra jazdaǵan edi. Biraq, «Ornynda bir ońǵalar» degendeı, súıekke sińgen dástúr umytylmasa eken. Keıingi jyldary qazaq jastarynan osyndaı úlgi alarlyq qadamdar jıi baıqalyp júr. Bir kúndik yrdý-dyrdý kelesi kúni umytylar, biraq qınalǵannyń qoltyǵynan demeý naǵyz tektilik, jaqsy áke-shesheniń tárbıesi. Ulttyq qunardyń ýyzynan qanyp ishken osyndaı jastar barda qazaq qasıeti aıdyndana bermek.
Baqtııar TAIJAN,
«Egemen Qazaqstan».
Qyzylorda oblysy.