Túrli aýrýlarǵa qarsy ekpe alýdyń mańyzy aıtpasa da túsinikti. Alaıda sońǵy jyldary syltaý taýyp, ekpe saldyrýǵa nemquraıly qaraıtyn ata-analardyń sany kóbeıip otyr. Atyraý oblysynda eki jylda 800-den astam balanyń ata-anasy aýrýdyń aldyn alý sharalarynan bas tartqan.
Qoǵamdyq densaýlyq saqtaý departamenti basshysynyń orynbasary Erbolat Ýaıysov ekpe saldyrtýǵa qarsylardyń basym bóligi dinı ustanymdaryn alǵa tartatyndaryn aıtady. Departament oblystyq Densaýlyq saqtaý basqarmasymen birlesip turǵyndardy ımmýndaýǵa baılanysty túsinik jumystaryn júrgizgen, sonyń nátıjesinde buryn ekpeden bas tartyp kelgen 100 balanyń ata-anasy ekpe jasatýǵa kelisim berdi. Vaksınadan bas tartý derekteri negizinen Atyraý qalasynda kóp tirkeledi, al aýdandar arasynda Jylyoı aýdany kósh bastap tur.
Sońǵy eki jylda aımaqta qyzylsha aýrýy tirkelmegen edi, al bıyl qańtar bastalysymen-aq 20 naýqastyń osy dertke shaldyqqany belgili boldy. Qoǵamdyq densaýlyq saqtaý departamentiniń mamandary qyzylshamen aýyryp jatqan balalardyń bári de ekpe almaǵandaryn aıtady. Osydan-aq ımmýndaý aptalyǵyna mán berý kerek ekenin ańǵarýǵa bolatyn sekildi.
Baqytgúl BABASh,
«Egemen Qazaqstan».
Atyraý