Halqymyzdyń bı ónerin nasıhattaýda aıryqsha eńbek etip júrgen áýlıeatalyq «Aqkerbez» bı ansambli taǵy bir belesti baǵyndyrdy. Myń burala bılegen segiz arýdan quralǵan top búginde ulttyq bı ónerin álemdik sahnalardan nasıhattaýǵa baǵyt aldy. Naqty aıtsaq, qazirgi tańda Halyqaralyq konkýrstardyń laýreaty «Aqkerbez» bı ansambli Birikken Arab Ámirlikteriniń Prezıdenti sheıh Halıfa men Zaıd ál-Nahaıan atyndaǵy gýmanıtarlyq uıymynyń uıymdastyrýymen Ábý-Dabı qalasynda ótetin Halyqaralyq sheıh Zaıd atyndaǵy mádenı festıvalge qatysyp jatyr. Bul is-sharanyń maqsaty – jyl saıyn Birikken Arab Ámirlikteri Ulttyq kúniniń toılanýyna oraı onyń halqy men qonaqtaryn álem elderiniń ulttyq mádenıetterimen tanystyrý. Elimizdiń ónerpazdary is-sharaǵa osymen tórtinshi ret qatysýda. Álemdik mádenıet maıtalmandarynyń pikirinshe, Qazaqstannan kelgen qatysýshylar árdaıym joǵary deńgeıdegi daıyndyqtarymen erekshelenip, únemi festıval qonaqtarynyń yqylasyna bólenip keledi.
Kenen Ázirbaev atyndaǵy Jambyl oblystyq fılarmonııasynyń málimetinshe, uıymdastyrýshylar qazaqstandyq ónerpazdarymyzǵa arnaıy oryn bólip, 8 adamnan turatyn ulttyq bı ansambliniń qarjylyq shyǵyndaryn ótep berýde eken. «Bul is-sharaǵa fılarmonııa ónerpazdarynyń qatysýy Memleket basshysynyń «Rýhanı jańǵyrý» bastamasyndaǵy mindetterge tolyǵymen jaýap berip, elimizdiń mádenıetin halyqaralyq dárejede jan-jaqty dáripteýge múmkindik berip otyr» deıdi «Aqkerbez» bı ansambliniń bas baletmeısteri Aıjan Qonarbaeva.
Áıgili Ábý Dabı tórinde elimizdiń kók baıraǵyn jelbiretken «Aqkerbez» bıshileri mundaǵy jergilikti ónersúıer qaýymǵa «Erke sylqym», «Álqıssa», «Aqqý», «Bıle, bıle», «Jaılaýda» atty ulttyq qazaq bılerin nasıhattaýda. Osylaısha, «Aqkerbez» bı ansambli aǵymdaǵy jylǵy 27 qańtarǵa deıin Ábý Dabı qalasynyń túkpir-túkpirinde jalǵasyn tabatyn festıvalde bes túrli bıimen erte zamannan qalyptasqan halqymyzdyń asa baı aýyz ádebıetimen, án-kúılerimen, dástúrli turmys saltymen bite qaınasyp kele jatqan el murasyn nasıhattaıtyn bolady.
Aıta ketý kerek, «Aqkerbez» bı ansambliniń óner jolynda 6 jyldyq tarıhy bar. Bı ujymy osy ýaqytqa deıin Elbasynyń «Rýhanı jańǵyrý» baǵdarlamasynyń «О́ńirlik mádenıet, dástúrler men qundylyqtar» bazalyq jobasyn júzege asyrý maqsatynda Kenen Ázirbaev atyndaǵy Jambyl oblystyq fılarmonııasynyń 50 jyldyq mereıtoıy aıasynda «Balasaǵun» ortalyq konsert zalynda Áýlıeata jurtshylyǵyna «Bı kerýeni» atty eseptik konserttik baǵdarlamasyn usynǵan bolatyn. Endi búginde Ábý Dabı tórinde ulttyq bı ónerin nasıhattap júrgen áýlıeatalyq arýlardyń jeńisti joly jalǵasa beretinine senim mol.
Hamıt ESAMAN,
«Egemen Qazaqstan»
Jambyl oblysy