Úsh kún buryn «Ohotzooprom» О́B» RMQK eki ınspektory men brakonerler arasynda qaqtyǵys bolǵan. Oqıǵa ornynda aýyr jaraqat alǵan ınspektor Erlan Nurǵalıev ómirden ótti. Bul týraly QR AShM resmı ókili Sáken Qalqamanov Feısbýktegi paraqshasynda jazdy.
Oqıǵa Qaraǵandy oblysynyń Nura aýdanynda sırek kezdesetin jáne joıylyp ketý qaýpi tóngen jabaıy ańdar men aqbókenderdi qorǵaý kezinde bolǵan.
«Búgin tańerteń «Ohotzooprom» ınspektory Erlan Nurǵalıev ómirden ozdy. Ol 13 qańtar kúni Qorǵaljyń dalasynda aıýandyq tanytqan 3 brakonermen aıqastan keıin ómiri úshin sońyna deıin kúresti. Qaza tapqan azamattyń otbasyna qaıǵyra kóńil aıtamyn. Ol ómiriniń sońyna deıin Qazaq dalasynyń sımvolyna aınalǵan kıikterdi qorǵaý jolyndaǵy boryshyn adal atqardy. Erlan Nurǵalıev syndy ınspektorlardyń kúsh-jigeriniń arqasynda 2015 jyly jappaı qyrylǵan kıik sany 215 myń basqa deıin kóbeıdi», dep jazdy Sáken Qalqamanov.
Buǵan deıin QR AShM resmı ókili Sáken Qalqamanov Qaraǵandy oblysynda brakonerlerdiń soqqysyna jyǵylǵan «Ohotzooprom» О́B» RMQK ınspektory E.Nurǵalıevtiń jaǵdaıy óte aýyr ekendigin aıtqan. Onyń janyn aman alyp qalý úshin Astana qalalyq №1 aýrýhanasynyń dárigerleri kúresken edi.
Aıta keteıik, 53 jastaǵy Erlan Nurǵalıev Aqmola oblysynda dúnıege kelgen. Bilimi - dene shynyqtyrý jáne áskerı daıyndyq oqytýshysy. 2012 jyldyń naýryzynan bastap «Ohotzooprom» О́B» RMQK Qaraǵandy tirek pýnktinde Ortalyq aımaqtyq fılıaldyń ınspektory qyzmetin atqardy.