Búgin qostanaılyqtar oblystyq balalar aýrýhanasy travmatologııa-ortopedııa bóliminiń meńgerýshisi Dmıtrıı Vladımırovıch Gerasımovpen qoshtasty.
Avtobýstyń ústinde jas áıel betin jýǵan kóz jasyn súrtýmen boldy. Qolyndaǵy telefonnyń ýatsabyna tanysy « Gerasımov kenetten qaıtys boldy» dep jazǵan eken. «Dáriger Gerasımov pa?» - dep anyqtaıdy ol.
« Iá, Dmıtrıı Vladımırovıch. Asyl adam edi ǵoı» dep jazady tanysy. Symbattyń qaıtyp jazýǵa shamasy kelmeı, kóz jasyna erik bergeni sol eken.
– Qyzymnyń nysanaly týǵan aıaǵyn jóndep, emdep bergen kisi edi. Aýrýhanada jatqanda palatadaǵy ár balanyń rýhanı ákesindeı, atasyndaı boldy. Bilikti, joǵary sanatty dáriger ekeni óz aldyna, zııalylyǵy, qarapaıymdylyǵy, meıirimdiligi qandaı edi! Barlyq ata-anamen sóılesýge ýaqyt tabatyn, aldyna kelgen adamǵa rııasyz qurmetpen qaraıtyn. Men aýrýhanada jatqan az ýaqytta osy bir meıirimdi adamdy ózimniń týǵan aǵamdaı, baýyrymdaı kórip kettim. Janymda jatqan jas analardyń barlyǵy balamyz táýir bolǵanǵa qýanyp, ol kisimen qımaı qoshtasqan edik, – deıdi ol jylap turyp.
Qyryq alty ǵana jas jasaǵan Dmıtrıı Vladımırovıchtiń qazasy qostanaılyqtarǵa ǵana emes, odan tys jerlerdegi ony biletin jandarǵa aýyr tıgeni málim. Sebebi joǵary sanatty dáriger, balalar ortopedııasynyń bilgiri Dmıtrıı Gerasımovke adamdar naýqas balasyn jetektep sońǵy úmitin artyp, oblys tóńiregin bylaı qoıǵanda, Qazaqstannyń ózge óńirlerinen, tipti Reseıden, odan da ári elderden keletin. Ol kóz aldynda jazylyp, oınap ketken ár balany qýanysh kórdi. Oblys basshylyǵy men jurtshylyq ókilderi bergen qazanamada: «Ol tabıǵatynda naǵyz balalar dárigeri edi, ony sábıdiń ózi sezingendeı bolatyn» dep jazdy.
Jaqsynyń jaqsylyǵy el gazeti «Egemenniń» de nazarynan tys qalmaǵan edi. 2017 jyly shildede «Egemen Qazaqstanda» jarııalaǵan maqalamyzda: «Biz tildesýge kelgen kúni Dmıtrıı Vladımırovıch segiz operasııa jasady. Qys aılarynda balanyń jaraqattanýy sıreksigendeı bolǵanymen, jazǵy kanıkýl kúnderinde kúıip qalǵan, bıikten qulaǵan, ıt qapqan sekildi balalardyń jaraqaty tolastamaıtyny bar. Onyń ústine ishten kemis týǵan balalarǵa josparmen jasalatyn operasııalar qanshama. Onyń arasynda kabınetiniń aldynda balasyn jetektegen ata-analar kezegi taǵy bar.
...Súıekti balanyń býyny qatpaı turyp, túzep jibergenge ne jetsin. Ol osy másele boıynsha «Vestnık hırýrgıı Kazahstana» jýrnalyna birneshe maqalalar jarııalady. 2012 jyly birneshe maqalalar jelisi Qazaqstan travmatologtary–ortopedteri sezine qatysýshylardyń úzdik tájirıbeleri qatarynda jaryq kórdi. 2010 jyly reseılik ǵalym, medısına ǵydymdarynyń kandıdaty, jaratylystaný akademıgi N.N.Smelyshevpen birlesip, «Rýkovodstvo po chrekostnomý osteosıntezý» atty kitap shyǵardy. Bul qazir Reseıde de, Qazaqstanda da ortopedter men hırýrgtar stolynyń ústinde jatatyn ádistemelik qural bolyp sanalady. Kitapty myń dana etip shyǵaryp, tegin taratty» dep jazyppyn.
Dárigerdiń janazasyna jınalǵan jurttan jer qaıysqandaı edi. Jaqsyny qımaǵan júrekter shymyrlaıdy. «Jaqsy bir ólmes bolsaıshy!..» degen osy eken.
Názıra JÁRIMBET,
«Egemen Qazaqstan»
Qostanaı