Qarjy mınıstrliginiń Memlekettik kirister komıteti «Atameken» UKP-nyń qoldaýymen «Túbirtekti talap et – júldeni utyp al!» respýblıkalyq aksııasyn ótkizgen bolatyn. Aksııaǵa qatysýshylar kóp boldy, kásipkerler de qarapaıym aýyl turǵyndary da elimizde salyq túsiminiń molaıýyna qomaqty úles qosyp, azamattyq pozısııasyn bildirdi.
Eske sala keteıik, ótken jyldyń sońynda Astanada aksııanyń qorytyndy utysy ótkizilip, jeńimpazǵa avtokólik kilti tabys etildi. Memlekettik kirister komıtetiniń málimetinshe, aksııa ótkizilgen kezeńde 30 myń azamattan shamamen 2,3 mln. chek qabyldanǵan. Chekterdiń basym bóligi Almaty qalasy men Túrkistan oblysynan jiberilipti. Jalpy respýblıka boıynsha 300-ge jýyq júlde oınatylǵan.
Mine sol júldelerdiń birine laıyq dep tanylǵan qatysýshylardyń biri - Túrkistan oblysy Leńgir qalasynyń turǵyny Janar Qozǵambaeva. Ol aksııanyń mobıldi qosymshasynyń taldaý ortalyǵy derekterine sáıkes «Eń belsendi salyq tóleýshi» nomınasııasynda jeńimpaz retinde aıqyndalǵan. Aksııa barysynda 91 myńnan asa chek jibergen Janar Qozǵambaevaǵa yntalandyrý júldesi – planshet taǵaıyndalǵan eken.
«Iá, aksııanyń maqsaty durys, paıdasy mol. Osyndaı ıgi sharaǵa úshinshi jyl qatysyp, óz úlesimdi qostym. Bul shara bastalǵan kúnnen aıaqtalǵanǵa deıin chekterdi barlyq talaptary boıynsha telefon arqyly kúndelikti jiberip otyrdym. Týǵan-týystaryma da satyp alǵan taýarlaryna túbirtek alýyn talap ettim. Osylaısha salyq túsiminiń kóbeıetinine óz úlesterin qosatynyn aıtyp túsindirdim. Men eki-úsh telefonnan 126 084 chek jibergenmin. Taýarlardy satyp alǵany, jumystardy oryndaǵany jáne qyzmetterdi kórsetkeni úshin aqshalaı esep-aıyrysýlar kezinde kásipkerlerdiń túbirtekterdi berýine qatysty baqylaý-kassalyq tártipti qamtamasyz etýge baǵyttalǵan aksııa jaqsy bastama jáne ıgi is», - deıdi Janar Qozǵambaeva.
Ǵalymjan ELShIBAI,
«Egemen Qazaqstan»
Túrkistan oblysy