Atalǵan maqalada Aqmola oblysynyń birqatar aýdanyndaǵy aýyz sý máselesiniń ótkir kúıinde turǵany, sonyń ishinde Kókshetaý qalasynyń irgesindegi Bereznıakovka aýylynyń turǵyndary sýdy tasymaldap iship otyrǵany jáne basqa da aýdandardyń eldi mekenderin sýmen qamtýda tolǵaqty máseleler qordalanyp qalǵany jazylǵan bolatyn.
Osy oraıda basylym betinde kóterilgen ózekti jaıtqa Aqmola oblysy Zerendi aýdanynyń ákimdigi resmı jaýap berdi.
Aýdan ákimdiginiń habarlaýynsha, búginde 547 turǵyny bar Bereznıakovka aýylyn sýmen qamtý maqsatynda aptasyna eki ret seısenbi jáne juma kúnderi sý tasıtyn avtokólikpen qajetti aýyz sý jetkizilip otyrady. Sý qubyry jelileri aýylda 20 jyldan asa ýaqyt boıy joq. 2012 jyly 12,8 mln teńgege Zarechnoe men Bereznıakovka aýyldaryna sý qubyry jelileriniń qurylysyna jobalyq-smetalyq qujattama ázirlengen. Qurylystyń smetalyq quny 579 mln teńgeni quraǵan. 2015 jyly qurylysty bastaý úshin respýblıkalyq bıýdjetten 295,4 mln teńge bólingen, biraq 2015 jyly 17 aqpanda respýblıkalyq bıýdjet komıssııasynyń sheshimi negizinde qarajat qaıtarylyp, jarııalanǵan konkýrstyq resimder toqtatyldy. 2018 jyly atalǵan qos aýylǵa sý taratý jelileriniń qurylysyna 5,8 mln teńgege jańadan jobalyq-smetalyq qujattama ázirlendi. Bul kezde qurylys-montajdaý jumysynyń quny 700 mln teńgeden astam qarajatty qurady.
Jobanyń memlekettik saraptamasy ótkizilgennen keıin qurylysty qarjylandyrý úshin joǵary turǵan bıýdjetke ótinim beriledi.
Aýdanda ortalyqtandyrylǵan sýmen qamtý jelilerin zararsyzdandyrý sharasy jyl saıyn ótedi. 2018 jyly bul maqsatqa 3 mln teńgeden astam qarjy jumsalǵan. Jalpy, Zerendi aýdany boıynsha ortalyqtandyrylǵan sýmen 26 868 turǵyn nemese aýdannyń 69,4 paıyzy qamtylǵan.
О́ńirdegi atalǵan máselelerdiń jergilikti atqarýshy organ tarapynan oń sheshimin tabýyn bas basylym aldaǵy ýaqytta da nazarda ustaıtyn bolady.