Jastar jyly el keleshegi - jastardy qoldaýǵa baǵyttalǵan is-sharalarmen erekshelenbek. «Rýhanı jańǵyrý» baǵdarlamasy aıasynda Jambyl atyndaǵy jasóspirimder kitaphanasynda «Maqsat. Áreket. Jetistik» serpin klýbynyń tanystyrylymy ótip, jas oqyrmandar klýbtyń baǵdarlamasy men baǵyttaryna qatysty pikirlerimen bólisti.
Kezdesýge jınalǵan jasóspirimderdiń basym kópshiligi kitaphananyń turaqty oqyrmandary. Jambyl atyndaǵy jasóspirimder kitaphanasy dırektorynyń mindetin atqarýshy Ǵazıza Nurǵalıeva «bir kezderde kitaphanaǵa kelýshiler sanynyń azaıyp ketkeni ras. Alaıda muny kitapqa qyzyǵýshylyqtyń azaıýymen emes, kez kelgen oqý ornynda ámbebap, zamanaýı kitaphanalardyń jasaqtalǵandyǵymen baılanystyramyz» deıdi. Al qazirgi kezde kópshilikke arnalǵan kitaphanalarǵa kelý úrdisi qaıta jandana bastady. Búginde kitaphana qory 300 myńnan asatyn Jambyl atyndaǵy jasóspirimder kitaphanasyna kúnine elý oqyrman jazylady eken. Sońǵy aıdaǵy kórsetkishter boıynsha jazylýshylardyń sany on myńnan asqan. Kórkem ádebıetter, IT, dızaın, medısına, ekonomıka, aǵylshyn tilindegi kórkem ádebıetter men ádistemelik quraldarǵa, sonymen qatar psıhologııalyq-fılosofııalyq kitaptarǵa suranys artyp keledi.
Sondaı-aq túrli taqyryptarǵa baılanysty ótetin trenıngter de kóbeıgen. Áleýmettik jelilerdiń de yqpaly baıqalady. Osy oraıda mektep oqýshylary men stýdentter úshin kásibı, bilikti mamandardyń keńesi asa qajet. Al kitaphanada júzege asyp jatqan jobalar arqyly jasóspirimderdiń ýaqytyn tıimdi paıdalanyp, zaman kóshinen qalmaýǵa baǵyttap otyrýǵa múmkindik bar. Sórelerde sap túzegen kitaptar olardy úlken ómir jolynda óz ornyn anyqtap, durys maqsat qoıýǵa, bilim aıasyn keńeıtýge yqpal etetin bolsa, arnaıy jobalar aqparattardy durys qabyldap, jyldam meńgerýge múmkindik beredi. 2019-2021 jylǵa josparlanǵan sharalar aıasynda jasóspirimder men jastarǵa baǵyt-baǵdar, keńester berý úshin aı saıyn túrli taqyryptarǵa arnalǵan kezdesýler ótetin bolady. Onyń barysynda salalar boıynsha mamandar shaqyrylyp, pikir almasý múmkindikteri qarastyrylǵan. Serpin klýbynyń aldaǵy jumystarymen tanystyryp ótken Jansaıa Sebepova arnaıy ázirlengen beınekórinisti oqyrmandar nazaryna usynsa, belgili psıholog Kámshat Bekjigitova jetistikke jetýdiń qyr-syryna qatysty ǵylymı dáıektelgen tájirıbeler turǵysynda kóptegen málimetpen bólisti.
Elvıra SERIKQYZY,
«Egemen Qazaqstan»
ALMATY