Qaraǵandy oblysy ákiminiń orynbasary qyzmetine buǵan deıin Qazaqstan Respýblıkasynyń Bilim jáne ǵylym vıse-mınıstri bolǵan Ashat Aımaǵambetov taǵaıyndaldy.
Jańa orynbasar bul qyzmette áleýmettik sala jáne ishki saıasat máseleleri boıynsha jetekshilik etetin bolady.
Ashat Aımaǵambetov 1982 jyly Qaraǵandy oblysynda dúnıege kelgen. «Tarıhshy, tarıh pániniń ustazy» jáne «quqyqtaný» mamandyqtary boıynsha eki joǵary bilimi bar. Eńbek jolyn 2002 jyly E.A. Bóketov atyndaǵy Qaraǵandy memlekettik ýnıversıtetinde bastaǵan. «Ańsar» jastar lıgasyn basqardy. Eki márte Qaraǵandy qalalyq máslıhatynda ózin-ózi usynýshy retinde depýtat bolyp saılanǵan.
2012 jyldan bastap memlekettik qyzmette. Qaraǵandy oblysyndaǵy Nura aýdany ákiminiń orynbasary, Qaraǵandy oblystyq Bilim basqarmasynyń jetekshisi qyzmetterin atqarǵan. 2017 jyldyń tamyzynan bastap osy kúnge deıin Bilim jáne ǵylym vıse-mınıstri laýazymynda bolyp, mektepke deıingi jáne orta bilim, sondaı-aq joǵary bilim men ǵylym máseleleri boıynsha jetekshilik etti.
Qaırat ÁBILDA,
«Egemen Qazaqstan»
Qaraǵandy