Almatyda tótenshe jaǵdaılardyń aldyn alý maqsatynda Esentaı ózeniniń arnalaryn bekitý jumystary júrip jatyr. Bıylǵy jaz aılarynda ózen jaǵalaýyndaǵy trotýarlardy, sport alańdaryn abattandyrý jáne jaryq jelilerin júrgizý isi qolǵa alynbaq. Mamandardyń aıtýynsha, munda 4000 aǵash otyrǵyzý josparlanǵan.
Qazirgi kezde uzyndyǵy 1,8 km bolatyn aýmaqqa tirek qabyrǵalaryn ornatý, ózen túbine temirbeton tóseý jáne tehnıkalyq joldardy abattandyrý jumystarynyń 65 paıyzy aıaqtalǵan. Atqarylǵan sharalar ýchaskede sý aýqymyn kúndelikti ótkizý qýatyn 10 esege deıin ulǵaıtpaq.
«Qurylys jumystary barysynda «Tokyo Rope Almaty» zaýytynda shyǵarylatyn otandyq ónimder qoldanylýda. О́ndirýshi álemdik joǵary sapaly standartqa saı aýyr gabıondarǵa 50 jyldan astam kepildik berýde. Megapolıs basshysy seldiń aldyn alý jumystaryna erekshe nazar aýdarylatynyn atap ótti. Sońǵy úsh jyl ishinde sel qaýpi bar ýchaskeler 67-den 12-ge qysqardy, toǵyz ózenniń arnalary rekonstrýksııalandy jáne 300 km aryq jelileri qaıta jasaldy. Shahardy odan ári damytýdaǵy basty qaǵıda qaýipsizdik pen taza ekologııa bolýy tıis», – deıdi qala ákimdiginiń baspasóz qyzmetiniń ókilderi.
Bulardan ózge, Almatyda «Aqsaı» jáne «Aıýsaı» jańa sý bógetterin salý isi de josparlanǵan. «Myńjylqy» sý bógetin rekonstrýksııalaý jumystary aıaqtalýǵa jaqyn. Osyǵan deıin qala aýmaǵyndaǵy Ermensaı, Kereńqulaq, Úlken jáne Kishi Qarasý sııaqty tórt ózenniń arnalary bekitilgen.
Arman OKTIаBR,
«Egemen Qazaqstan»
ALMATY