Elbasy Jarlyǵymen Almaty oblysynyń Raıymbek aýdanynyń qaıta qurylǵanyna áli jyl tola qoımady. Aımaqta shekaralyq óńirdi damytýǵa baǵyttalǵan is qarqyndy júrip jatyr.
Máselen, aýdan ortalyǵy Narynqol aýylynda jas mamandarǵa arnalǵan 109 turǵyn úıdiń qurylysy bastalǵan. Qazir 20 úı paıdalanýǵa berilip te qoıǵan eken. Aýyldaǵy jańadan salynǵan baspana birinshi kezekte memlekettik qyzmetkerlerge jalǵa berý ádisimen bólingen. Jańadan ashylǵan aýdan bolǵandyqtan, Narynqolǵa kelip turaqtap jatqan jas mamandar úshin baspana jaıy qıyndyq týǵyzǵan edi. Buıyrsa, bıyl qalǵan 89 úı de qoldanysqa berilmekshi.
Jalpy, qaıta qurylǵan aýdanǵa baǵyttalǵan jumys nátıjesi bir jylǵa jýyq ýaqyttyń ishinde aıqyn nátıje bere bastady. Aýdan ortalyǵyndaǵy joldar jóndeldi, jaryqtandyrý júrgizildi, turǵyn úıler salyndy, balalar alańdary men sporttyq alańdar paıdalanýǵa berildi.
- Eń bastysy, shekaralyq aýdanǵa jastar qaıta orala bastady. Elbasynyń Jarlyǵy shyqqannan bergi ýaqytta aýdanǵa 700 adam qonys aýdarǵan. Sondyqtan jas mamandardy baspanamen qamtý eń mańyzdy máseleler qatarynda. 20 jalgerlik úıdiń qurylysyna oblystyq bıýdjetten 395,3 mln teńge bólingen bolatyn, búgingi kúni bul úıler paıdalanýǵa berildi, - dedi jaqynda Narynqol aýdanyna arnaıy saparmen barǵan oblys ákimi Amandyq Batalov.
Qalmahanbet MUQAMETQALI,
«Egemen Qazaqstan»
Almaty oblysy