19 qańtar – pravoslav hrıstıandar «Kreshenııa Gospodnıa» dinı merekesin atap ótedi. Bul kúni olar muzdy oıyp, sýǵa túsip, «sýmen shoqyný, sýmen tazarý» rásimin jasaıdy.
Bir qyzyǵy, Oral qalasynda bul mereke jalpyhalyqtyq sıpat alǵan. Iаǵnı qystyń qaqaǵan aıazynda Jaıyqtyń muzyn oıyp, bir súńgip shyǵý úshin ózenge aǵylǵan nópir halyqtyń ishinen orys pen qazaqty, musylman men hrıstıandy qatar kórýge bolady.
- Bul kúni halyq jıi shoǵyrlanatyn jerlerde bizdiń qyzmetkerlerimiz, qutqarýshylar kezekshilik etip, turǵyndardyń qaýipsizdigin qamtamasyz etetin bolady, - deıdi Batys Qazaqstan oblystyq Tótenshe jaǵdaılar departamenti Tótenshe jaǵdaılardy joıý bóliminiń bastyǵy, azamattyq qorǵaý podpolkovnıgi Baqytjan Ihsanov.
Bıyl sýǵa túsýge nıet bildirgender úshin Oral qalasy aýmaǵyndaǵy Jaıyq, Shaǵan, Derkól jáne basqa ózen-kólderge arnaıy 14 sýat oıylyp, adamdar túsip-shyǵatyn baspa-saty ornatylmaq.
- Qańtarda muzdaı sýǵa túsý ońaı emes. Sondyqtan aldyn ala qaýipsizdik sharalaryn qatań eskerý kerek. Sý ishinde 10-20 sekýndtan artyq bolýǵa bolmaıdy. Muz ústinde, sýǵa túsip-shyǵarda taıyp qulamaý úshin arnaıy aıaq kıim, súrtinetin súlgi, ystyq shaı sekildi nárselerdi aldyn ala qamdaý kerek, - deıdi tótenshelikter.
О́tken jyly 19 qańtarda Jaıyq ózeninde Oral qalasynyń Kóne sobor atalatyn aýmaǵyndaǵy bir oıyqqa ǵana 2 myńnan asa adam sýǵa túsip shyqqany tirkelgen.
Qazbek QUTTYMURATULY,
«Egemen Qazaqstan»
Batys Qazaqstan