Jambyl oblysynyń ákimi Asqar Myrzahmetovtyń qatysýymen arnaıy ótken jıynda byltyrǵy jylǵy qol jetkizilgen kórsetkishter men áleýmettik-ekonomıkalyq damý, sonymen qatar respýblıkalyq bıýdjettiń atqarylýynyń qorytyndysy jáne aǵymdaǵy jyldyń jospary qaraldy. Oblystyq Ekonomıka jáne bıýdjettik josparlaý basqarmasynyń málimetinshe, 2018 jyldyń qańtar-jeltoqsan aılarynyń qorytyndysy boıynsha ekonomıkanyń barlyq salasynda 4-5 paıyz ósim baıqalǵan.
Jyl sońynda oryndalmaı qalý qaýpi bolǵan ónerkásiptegi ónim kólemi, kurylys, ınvestısııa kórsetkishteri boıynsha jospar jyldyń qorytyndysymen oıdaǵydaı qalyptasqan. Atap aıtar bolsaq, ónerkásip óniminiń naqty kólem ındeksi jyl qorytyndysymen 102,6 paıyz, qurylys 105 paıyz, negizgi kapıtalǵa salynǵan ınvestısııa kólemi 108, 4 paıyzǵa oryndalǵan. Sonymen qatar, Jambyl oblysynda qarjy ıgerýde de oń dınamıka saqtalǵan.
Jıyn barysynda Asqar Myrzahmetov ekonomıkalyq kórsetkishterdegi oń dınamıka bir jyldyq tynymsyz eńbektiń nátıjesi ekendigin jetkizdi. Ásirese, ónerkásiptegi ónim kóleminiń ósimi orta jáne shaǵyn kásipkerlikterdi jandandyrý, kásiporyndardyń ónimdilik júktemelerin arttyrý arqyly múmkin bolǵanyn aıryqsha atap ótti. О́z sózinde ákim ótken jylǵy nátıjemen toqtap qalýǵa bolmaıtynyn, aǵymdaǵy jyly atqarylatyn sharýalar odan da aýqymdy ekenin basa aıtty. Sodan keıin barlyq basqarma men aýdandardyń jyldyq jumysynyń qorytyndysy egjeı-tegjeıli qaralyp, baǵasy shyǵarylatynyn da jetkizdi. Aıta ketý kerek, aldaǵy qorytyndy-baǵalaý jıyndary jańa formatta, ıaǵnı, naqty kezdesip otyrǵan ózekti máseleler, onyń sheshý joldaryn qarastyrý boıynsha ótedi.
Sondaı-aq, oblystaǵy 30 aýmaqtyq departament, ınspeksııa jáne basqarmalarmen birlesip jumys jasaý da jolǵa qoıylatyn bolady. Ol úshin oblystyq salalyq basqarmalardyń jumys josparyndaǵy mindettemelerge barlyq departament pen ınspeksııalardy qatystyrý kózdelýde. Jáne oblys ákimdigi men basqarmalardyń, basqarma men aýdan ákimderiniń arasyndaǵy memorandýmdaǵy ındıkatorlardyń birqatary qaıta naqtylanady. Jıynda oblys ákimimen bekitilgen medıa jospardyń oryndalýy jáne basqarmalar men aýdan ákimderiniń baspasóz mamandarynyń jumystaryn jandandyrý máseleleri de qaraldy.
Hamıt ESAMAN,
«Egemen Qazaqstan»
Jambyl oblysy