17-19 qańtar aralyǵynda Batys Qazaqstan oblysynda «Avtobýs» jedel-saýyqtyrý sharasy ótip jatyr. Sharanyń maqsaty – alys-jaqyn qashyqtyqta jolaýshy tasymalymen aınalysatyn kólik ıeleriniń tártibin tekserý.
Jýrnalısterdiń qatysýymen ótken alǵashqy kúndik reıd kezinde «Rýbej-Oral» stasıonarlyq beketinde tekserilgen «GAZel» avtokóligi júrgizýshisiniń qujattary durys bolmaı shyqty. О́zbekstan Respýblıkasynyń azamattaryn tıep alyp, «Voronej-Shymkent» baǵytyna jol tartqan kólik Qazaqstan Respýblıkasy Ákimshilik Quqyqbuzýshylyq týraly Kodekstiń úsh birdeı babyn buzǵan eken. Júrgizýshiniń eńbek rejımi saqtalmaǵan, qaýipsizdik beldigin qoldanbaǵan jáne kólik quralyn paıdalaný erejesin buzǵan júrgizýshi ákimshilik jaýapkershilikke tartyldy.
- 2018 jyly óńirde qoǵamdyq kólikter 11 márte jol-kólik oqıǵasyna ushyraǵan. Bul oqıǵalardan 7 adam qaza taýyp, 15-i ártúrli jaraqat aldy. Osy 11 oqıǵanyń altaýy – avtobýs júrgizýshiniń kinásinen bolǵan eken. Nátıjesinde 3 adam ólip, 6 jolaýshy jaralandy, - deıdi Batys Qazaqstan oblystyq Polısııa departamentiniń baspasóz qyzmetkeri Álııa Naýryzǵalıeva.
Qazaqstanda 16-20 qańtar aralyǵynda elimizdiń kóshi-qon zańdylyqtaryn buzýshylardy anyqtaý maqsatynda «Mıgrant» jedel-saýyqtyrý sharasy da ótip jatyr.
Qazbek QUTTYMURATULY,
«Egemen Qazaqstan»
Batys Qazaqstan