Shekarada taýar aǵyny tekserilýde

Osy maqsatta Reseı Federasııa­symen jáne Qyrǵyzstanmen aradaǵy shekaranyń barlyq avtobeketterine 300-ge jýyq qyzmetker jiberildi. Olar eksportqa shyǵatyn jáne ımportpen keletin taýarlardy tekserip otyrady. Bul týraly Qarjy mınıstrliginiń Memlekettik kirister komıtetiniń jaýapty tulǵalary ótkizgen brıfıngte aıtyldy. 

Komıtettiń eksporttyq baqylaý basqarmasynyń jetekshisi Ánýar Mádıevtiń aıtýynsha, bıyl 16 qańtardan beri 37 avtobekette 277 adam jumys isteýde. Olarǵa birneshe mindet júktelgen. Birinshiden, komıtet qyzmetkerleri eksporttyq baqylaýǵa jatatyn taýarlardy qadaǵalaıdy. Ekinshiden, bajdyń tómen­detilgen mólsherlemesine kire­tin taýarlardy tekseredi. Ondaı taýar­larǵa 3 myńǵa jýyq ónim kiredi. Úshinshiden, Eýrazııalyq ekono­mıkalyq odaq aıasynda taýarlardy satý, jumystardy oryndaý jáne qyzmet kórsetý kezinde ımportqa qosylǵan qun salyǵynyń tolyq túsýin baqylaıdy. 

Bul monıtorıng tıisti laýa­zym­dy tulǵalarǵa beriletin qu­jat­tar­dy skanerleý arqyly júrgiziledi. 

Osylaısha, memlekettik kirister organdary laýazymdy tulǵalarynyń tasymaldaýshylarmen baılanysy joıylady.

Memlekettik kirister organ­dary­nyń laýazymdy tulǵalary min­det­terin oryndaý kezinde júkti tek­serip qaraýdy derbes júrgiz­beıdi. Baqy­laýdyń bul túri atalǵan tulǵa­lar­dyń qyzmettik mindette­melerine kirmeıdi. 

«Búginde elimizdiń aýmaǵynan qara jáne tústi metaldardyń syny­ǵy men qaldyqtaryn áketýge ty­ıym salynǵan. Memlekettik kirister komıtetiniń qyzmetkerleri osy má­seleni de jiti qadaǵalap otyra­dy. Buǵan deıin biz Batys Qazaq­stan oblysyndaǵy «Syrym» avto­beketinde qanatqaqty rejimde jumys istep kórdik. Sol kezde júk ta­sy­mal­daýshylar tarapynan nara­zy­lyq boldy. Sondyqtan aldaǵy ýaqytta túsinispeýshilikter bolmasyn dep, barlyq ımporttaýshylar men eksporttaýshylarǵa aldyn ala xabar bergimiz kelip otyr», dedi Á.Mádıev baspasóz máslıxatynda.

Suńǵat ÁLIPBAI,

«Egemen Qazaqstan»