Aýyr salmaqta beldesetin erkin kúres sheberi Dáýlet Shabanbaıǵa araǵa jeti jyl salyp Olımpııa oıyndarynyń qola medali tabystalatyn boldy. Este bolsa, 2012 jyly Londonda ótken tórtjyldyqtyń basty básekesiniń jartylaı fınalynda otandasymyz grýzın palýany Davıd Modzmanavshılıge ese jibergen edi.
Halyqaralyq Olımpıada komıtetiniń habarlaýynsha, grýzın sportshysynyń qanynan tyıym salynǵan preparattar tabylǵan.
«Davıd Modzmanavshılıdiń qanynan tyıym salynǵan preparattar tabylyp, Olımpıada-2012 erejesin buzdy. Ol qatysqan týrnırden shettetilip, 120 kg deıingi salmaqta erler arasyndaǵy erkin kúresten alǵan medalin qaıtarýǵa mindetteledi», – dep jazylǵan HOK resmı habarlamasynda.
Osylaısha, Davıd kúmis medalinen aıyrylyp, ony reseılik Bılıal Mahov alady, al reseıliktiń enshisindegi qola medal Dáýlet Shabanbaıǵa beriledi.
Eske salsaq, Dáýlet Shabanbaı Azııa chempıonatynyń tótr dúrkin qola júldegeri (Ońtústik Koreıa – 2008, Taıland – 2009, Tashkent – 2011, Astana - 2014), «Sıolkovskıı memorıaly» halyqaralyq týrnıriniń qola júldegeri (Polsha, 2012 j.), Gran-Prı júldegeri (Germanııa 2013), «Tahtı kýbogy» halyqaralyq týrnıriniń kúmis júldegeri (Iran, 2014), Azııa oıyndarynyń kúmis júldegeri (Ońtústik Koreıa, 2014). Qazaqstan Respýblıkasynyń sport sheberi. Halyqaralyq dárejedegi sport sheberi.
Arman OKTIаBR,
«Egemen Qazaqstan»
ALMATY