Sybaılas jemqorlyqqa qarsy is-qımyl ulttyq bıýrosynyń oblystyq departamenti ótken jyldy qorytyndylap, para alý, alaıaqtyq jáne qyzmetin asyra paıdalanǵan memlekettik qyzmetkerlerdiń atyn atap, túsin tústedi.
О́tken jyly 75 zań buzýshylyq áshkerelengen. Onyń 25-i para alý bolsa, 16-sy – alaıaqtyq. Qylmystyq jaýapkershilikke tartylǵan 35 laýazymdy tulǵanyń 14-i – ákimdik, 7-i - ishki ister organdarynyń qyzmetkerleri. «Barmaq basty, kóz qystylyqtyń» kóshin ákimdiktegiler bastap tur. Olardan qurylys, turǵyn úı-kommýnaldyq sharýashylyǵy jáne quqyq qorǵaý salasynyń qyzmetkerleri de qalysar emes.
«Byltyr 63 is sotqa jiberildi. Onyń biri oblystyq Memlekettik sáýlet-qurylys baqylaý jáne lısenzııalaý basqarmasynyń burynǵy basshysy Murat Abylaevqa qatysty. Ol qylmystyq jospar quryp, «kórsetilgen» ár qyzmeti úshin 700–1500 dollar aralyǵynda para alyp kelgen. Eks-sheneýnik «aýzyn maılaǵandardy» tıisti emtıhannan súrinbeı ótkizip, tehnıkalyq qujattardy esh kedergisiz jasap berip otyrǵan. Tipti, Astana, Aqtaý, Shymkent qalalarynda attestasııadan óte almaı júrgender osynda kelip, «maıshelpekke batqan». Abyroıy aırandaı tógilgen memlekettik qyzmetshi 8 jylǵa bas bostandyǵynan aıyrylypty.
Departament basshysy Elena Stepatenkonyń aıtýynsha, Taıynsha aýdanynyń ákimi Vladımır Dýdovtyń qyzmet babyn jeke basyna paıdalaný áreketi Ádep jónindegi keńeste talqylanyp, qyzmetinen bosatý týraly usynys aıtylyp, sheshim oryndalǵan. Laýazymdy tulǵa ıesi eki márte appellıasııalyq shaǵym túsirgenimen, qanaǵattandyrylmaǵan.
Jıynda Mamlıýt aýdanynyń burynǵy ákimi Jastilek Syzdyqovtyń kásipkerden185 myń rýbl para bopsalaǵany úshin qyzmetten bosatylǵany, 22 mıllıon teńge aıyppul salynǵany da aıtyldy.
О́mir ESQALI,
«Egemen Qazaqstan»
Soltústik Qazaqstan oblysy