Sábıt Muqanov atyndaǵy oblystyq kitaphananyń oqyrmandary kitap qoryna túsken tyń týyndylarmen tanysýǵa múmkindik aldy.
Olardyń qatarynda ádebı, tarıhı, bıznesti júrgizý, menedjment, psıhologııa salalaryna arnalǵan qundy dúnıeler kóp. Kópshilik nazaryna 300-den asa eńbek usynylsa, basym bóligi memlekettik tapsyryspen kelgen. Keıbiri tartý etilipti.
«Kórmege qoıylǵan kitaptar arasynan Qazaq handyǵy men Sın patshalyǵy arasyndaǵy saıası-dıplomatııalyq qatynastar jaıly eńbekti erekshe ataýǵa bolady. Qyzyqty derekter Qytaı muraǵatynan alynǵan. Budan basqa da tartymdy shyǵarmalar barshylyq. Onyń biri Qazaqstan men Koreıa memleketteri birlesip shyǵarǵan «Qazaq dalasy ámirshileriniń altyny» dep atalady. Onda elimizdegi mádenı eskertkishter jaıly keńinen qamtylǵan. Mustafa Shoqaı shyǵarmalarynyń 12 tomdyq jınaǵy ult qaıratkeriniń 130 jyldyq mereıtoıyna oraı syıǵa berilgen. Balalarǵa arnalǵan bazarlyqtar da az emes. Janýarlar jaıly derekter de jetkilikti» deıdi kitaphanashy Názıra Ysqaqova.
Kitaphana esigin alǵashqylardyń biri bolyp ashqan Danash Jýkenova «Menedjment negizderi» atty týyndy jaıly áserlerimen bólisti. Bolashaq menedjer paıdaly aqparattardy molynan kezdestirgenin, qazaq, orys jáne aǵylshyn tilderinde jazylǵan ádebıet, bıznesti júrgizý, psıhologııa salalaryna arnalǵan qundy dúnıelerdiń moldyǵyn aıtady.
Sábıt Muqanov atyndaǵy oblystyq kitaphana qory jyl saıyn 8-9 myń týyndymen tolyǵyp otyrady.
О́mir ESQALI,
«Egemen Qazaqstan»
Soltústik Qazaqstan oblysy