Bul másele kópten beri aıtylyp kele jatsa da, áli kúnge deıin naqty sheshimin tappaı otyr.
Ásirese, demalys kúnderi saýda oryndary mańaıynda kólikterdiń keptelisin jıi kezdestirýge bolady. Máselen, aýyldan kelgen aǵaıyndar «Arman» ortalyq bazaryna jetý úshin kólikterin alysqa tastap ketýge májbúr. Sóıtip, satyp alǵan zattaryn jaıaý-jalpylap tasýlaryna týra keledi.
Jergilikti bılikke degen ókpesi qara qazandaı kásipkerlerdiń biri – Sergeı Krýpenıch. Ol Jambyl aýdanynyń ortalyǵy Presnovkada turady. Onda ornalasqan dúkenge taýarlar alý úshin oblys ortalyǵyna aptasyna 2-3 márte qatynaıdy. Ár kelgen saıyn osyndaı qıyndyqtarǵa tap bolady.
«Kúndiz bazar aýmaǵyna kirý múldem múmkin emes. Basty mashaqat jaqyn jerlerde avtoturaq qarastyrylmaǵan. Sondyqtan elden túndeletip shyǵyp, erterek kelýge tyrysamyz» deıdi S. Krýpenıch.
Arnaıy avtoturaqtar kópqabatty úılerde de jetkiliksiz. Mektep aýlalaryna da qajet. Shetin máseleni qalalyq qoǵamdyq keńestiń músheleri shahar basshylyǵyna jetkizipti. Aleksandr Kazansevtyń aıtýynsha, áleýmettik mańyzy bar nysandarda avtoturaqtyń azdyǵyna qatysty eskertýler men usynystar jınaqtalyp, ákimdik qaraýyna usynylypty.
«Zańda 1 metr jer úshin 5,79 teńge salyq tóleý kórsetilgen. Ony 10 esege deıin ósirýge bolady. Osyny alǵa tartyp, jergilikti bılik salyqty arttyrǵysy keldi. Biz buǵan jol bermedik. Qazynaǵa túsetin aqshanyń mólsherin sol kúıinde qaldyrdyq. Nege deseńizder, saýda oryndarynyń ıelerine parkıng salý, avtoturaqtaryn keńeıtý múmkindigin berý qajet. Kásipkerler eselep salyq tólegenshe osyndaı paıdaly ispen aınalysqandary durys degen sheshimge keldik» deıdi qalalyq máslıhattyń depýtaty.
Bereke yqsham aýdanyndaǵy Malaıa jáne 5-shi Sennaıa kóshelerin keńeıtý arqyly avturaqtar salý týraly jospar 2017 jyly ázirlengenimen, joba áli kúnge deıin qoldaý tappapty.
О́mir ESQALI,
«Egemen Qazaqstan»
Soltústik Qazaqstan oblysy