AQSh pen KHDR arasyndaǵy ekinshi sammıt aqpanda ótedi. Reıter agenttiginiń habarlaýynsha, juma kúni Aq úı ákimshiligimen kezdesken soltústikkoreıalyq dıplomat osyndaı kelisimge qol jetkizgen.
Aq úıdiń baspasóz hatshysy Sara Sanderstiń aıtýynsha, AQSh prezıdenti Donald Tramp pen KHDR ókili Kım Iong Chol bir jarym saǵat boıy áńgimelesip, ıadrolyq qarýdan bas tartý jóninde jáne ekinshi sammıttiń merzimi týraly pikir almasqan.
Reıter agenttiginiń málimetine súıensek, AQSh tarapy Soltústik Koreıaǵa qatysty sanksııadan bas tartpaıdy. Áıtse de, ekijaqty kelissózderdi júrgizýge taraptar kelisim bergen.
Al Ońtústik Koreıa aldaǵy kezdesýdiń mańyzy zor ekenin aıtyp otyr. Mýn Chje In ákimshiligi sammıt jumysy Koreıa túbeginde tynyshtyq pen beıbitshilik ornatýǵa mol úles qosady dep esepteıdi.
Ońtústik Koreıanyń baspasóz hatshysy Kım Yı Gıom málimdeme jasap, Seýl bıligi AQSh jáne basqa memlekettermen birlesip ıadrolyq qarýdan bas tartý jáne álemde beıbitshilik ornatý jolynda naqty ári praktıkalyq is-qımyldar jasaıtynyn jetkizgen.
Alaıda AQSh tarapy kelissózder ótkizýge ynta tanytqanyna qaramastan, qorǵanys máselesin esten shyǵarmaǵan eken. Ulybrıtanııanyń The Guardian gazeti D.Tramp AQSh-tyń raketaǵa qarsy qorǵanysyn damytýdyń josparyn tanystyratynyn habarlady. Qorǵanys jumystary zamanaýı ǵaryshtyq qurylǵylar negizinde jasalmaq. Pentagonda tanystyrylatyn joba «qaýipti» memleketterdiń snarıadtaryn anyqtaýǵa, buǵattaýshylar jelisin kóbeıtýge múmkindik beredi.