Kúrshim aýdanynda oqys oqıǵa oryn alyp, bes adam otyrǵan jeńil avtokólik muz astyna túsip, jolaýshylardyń ishindegi 6 jastaǵy qyz sýǵa batyp ketti.
Oblystyq Tótenshe jaǵdaılar departamenti mamandary qaıǵyly jaǵdaı 18 qańtarda keshki saǵat toǵyzdar shamasynda Alǵabas aýylynan 10 shaqyrym jerdegi Buqtyrma sý qoımasynyń Aqqudyq ýchaskesinde bolǵanyn, Vaz-2109 mashınasymen jolǵa shyqqan turǵyndar tumanda adasyp, kólikpen júrýge tyıym salynǵan jermen ótpek bolyp, baıqaýsyzda kólikteri muz astyna túsip ketkenin habarlady. Kólik salonynda úsh bala men eki eresek adam bolypty. Tórteýi sý betine óz kúshterimen shyqqan kórinedi. Departamenttiń baspasóz qyzmeti qutqarýshylar keshe, ıaǵnı 19 qańtarda tańǵy mezgilde 2013 jyly týǵan qyzdyń denesin izdep tapqanyn jetkizdi.
Aıta keteıik, bul – Kúrshim aýdanyndaǵy alǵashqy jaǵdaı emes. Osydan biraz ýaqyt buryn bir adam kóligimen muz astyna túsip ketip, qaıtys bolǵan edi.
Azamat QASYM,
«Egemen Qazaqstan»
Shyǵys Qazaqstan oblysy,
Kúrshim aýdany