Aqtóbelik kásipkerler Prezıdenttiń 2018 jyly aýyldyq aımaqtardyń áleýmettik ortasyn jańǵyrtý aıasynda bastamalyq etken «Aýyl - el besigi» aýqymdy jobasyn damytýǵa qoldan kelgen úlesterin qosýda. Elbasy bastamasy óńirde keń qoldaý taýyp, «Aýyl qamqorshysy» aksııasy bastaldy.
Oblys ákimdiginde óńirdegi bıznes qoǵamdastyq pen memlekettik qurylymdardyń ókilderi jobanyń tıimdi júzege asyrylýy máselelerin talqylady.
«Kásipkerlerdiń bir de bireýi ıgi isten tys qalmasyn. Árqaısysy ózin tárbıelegen týǵan jerin damytýǵa, Memleket basshysynyń barlyq áleýmettik bastamalaryn júzege asyrýǵa úles qosýy kerek», - dedi Berdibek Saparbaev.
Aıta keteıik, byltyr Aqtóbe oblysynda 2 mlrd teńgege 344 joba júzege asyrylǵan bolatyn, ıaǵnı jańa áleýmettik nysandar salyndy, jolda men kópirler jóndeldi, bilim berý, densaýlyq saqtaý mekemeleriniń materıaldyq-tehnıkalyq bazasy kúsheıtildi, az qamtylǵan jáne kóp balaly otbasylarǵa kómek kórsetildi.
Osy jyly kásipkerler týyp-ósken aýyldaryn qamqorlyqqa alýdy jalǵastyryp, 2,6 mlrd teńgege kómek kórsetýdi josparlap otyr. Osylaısha, 289 mesenat 199 eldi mekende 314 jobany júzege asyrýǵa ýáde berdi. Onyń ishinde 4 joba densaýlyq saqtaý, 16 bilim berý, 69 TKSh, 95 mádenıet pen sport jáne t.b. Negizinde, saıabaqtardy abattandyrý, sporttyq jáne oıyn alańdaryn ornatý sharalary, jol jumystary júrgizilip, aýyl klýbtary men mádenıet oshaqtary jóndelmek.
QR mádenıet qaıratkeri, Qazaqstan halqy assambleıasynyń «Birlik» aqsaqaldar keńesiniń tóraǵasy Erkin Qurmanbekov aýyldardy jańǵyrtý jańa nysandardy ashý ǵana emes dep esepteıdi. Onyń oıynsha, ıdeologııalyq quramdasqa da nazar aýdarǵan mańyzdy, ıaǵnı óskeleń urpaqty patrıotızm, Otanǵa degen súıispenshilik rýhynda tárbıeleıtin aqsaqaldar ınstıtýtyn qaıta jandandyryp, aýyl turǵyndaryn odan ári biriktiretin «Eń úzdik aýyl» baıqaýyn ótkizgen jón.
Aıta keteıik, «Rýhanı jańǵyrý» baǵdarlamasy, Prezıdenttiń «Uly dalanyń jeti qyry» maqalasy aıasynda «Atameken - atalar. Asylym - ájeler» ansambli oblystyń barlyq aýdandarynda konsert beredi.
«Aýyl qamqorshysy» jobasynyń qatysýshylary aldaǵy jylǵa josparlarymen bólisti.
Atap aıtqanda, Alǵa aýdanynyń Amangeldi aýylynda óz qarajatyna Mádenıet úıin salǵan «Reımqul» sharýa qojalyǵynyń basshysy Samat Qaldyǵulov saıabaqty abattandyryp, aýyl turǵyndary úshin qoǵamdyq monsha men 10 úı salyp berýdi kózdep otyr.
Mártók aýdanyna qarasty Hazret aýylynan shyqqan «Agrofırma Kokvest» JShS basshysy Vladımır Proskýrın 2018 jyly ortalyq sýmen jabdyqtaý quralyn qalpyna keltirip, búkil zeınetkerdiń úıin tegin aýyz sýmen qamtysa, 2019 jyly kópirdi jóndep, jerlesteriniń aǵymdaǵy máselelerin sheship berýdi josparlap otyr.
Mesenat, «Naýryz SIM» JShS dırektory Ibragım Sársenbaev bıyl Yrǵyz aýdanynda quny 20 mln teńge turatyn sport keshenin salmaq. «Altyn dala» sharýa qojalyǵynyń basshysy Sándibaı Álıturlıev Qobda aýdanynyń Qarakemer aýylynda elý oryndyq balabaqshanyń qurylysyn bastaıdy jáne Jarsaı aýylyna sport zal tartý etedi.
Oblys ákimi: «Oblystaǵy barlyq kásipkerlerdiń Elbasy bastamasyn qoldap, bar kúshterin salýǵa daıar ekenderi qýantady. Biz Prezıdent tapsyrmalaryn sapaly ári ýaqytynda oryndaýymyz qajet», - dep sózin túıindedi.