Aqordada Memleket basshysy Nursultan Nazarbaev pen Zımbabve Prezıdenti Emmerson Mnangagvamen kezdesýi boldy. Eki el basshylarynyń shaǵyn quramdaǵy kelissózderi jabyq esik jaǵdaıynda ótti.
Elbasy Emmerson Mnangagvany Qazaqstanǵa alǵashqy resmı saparymen quttyqtap, seriktestikti damytýǵa baǵyttalǵan josparlarymen bólisti.
«Bizdiń óńirge alǵash ret sapar shegip otyrsyz. Eki el arasyndaǵy dıplomatııalyq qarym-qatynas 1992 jyly ornady. Sodan beri eki el basshylary alǵash ret kezdesip otyrmyz. Sondyqtan bul kezdesýdiń Ortalyq Azııa, Ońtústik Afrıka elderi arasyndaǵy yqpaldastyqty nyǵaıtý úshin mańyzy zor. Biz álemniń bul aımaqtarymen áli seriktestik ornatqan joqpyz. Sondyqtan, aradaǵy qashyqtyq saldarynan týyndaǵan saıası, ekonomıkalyq qarym-qatynasty damytýdy jolǵa qoıyp otyrmyz», dedi Nursultan Nazarbaev.
Sonymen qatar Prezıdent eki eldiń uqsastyqtaryn da atap ótti. «Zımbabve de elimiz sekildi qazba baılyqtarǵa baı. Endigi kezekte Mendeleev tablısasynyń 50 elementi bar Zımbabve memleketimen seriktestik ornatý máselesin alǵa qoıamyz. Aýyl sharýashylyǵy sektory da josparǵa enip otyr. Taý-ken salasyndaǵy tájirıbe almasý, Zımbabvege bıdaı men et tasymaldaý máselesi jolǵa qoıylady. Zımbabve memleketi bizdiń transport-logıstıkalyq tájirıbemizdi qoldanysqa engizýge kelisti» dedi N.Nazarbaev.
Odan bólek Elbasy halyqaralyq saıasatta Zımbabveniń qoldaýyn baǵalaıtynyn aıtyp ketti. О́ıtkeni, Zımbabve – Afrıka Keńesiniń bedeldi múshesi, BUU belsendi qatysýshysy. BUU Qaýipsizdik Keńesi aıasynda áriptesikti jalǵastyrýǵa, sonymen qatar, Qazaqstan baqylaýshy bolyp keletin Afrıka Keńesiniń sheńberinde seriktestikti damytýǵa keliskenin habarlady.
«Emmerson Mnangagvanyń alǵashqy resmı sapary eki el arasyndaǵy seriktestikti damytýǵa ekijaqty nıetin kórsetti. Alǵa qoıǵan josparlarymyz, resmı ókilderimizdiń kezdesýi, seriktestik keńesin qurý eki el áriptestiginiń damýyna úlesin qosaryna senemin» dedi Memleket basshysy sóz sońynda.