Keshe oblystyń Úrjar aýdany aýmaǵynda, «Almaty-О́skemen» respýblıkalyq jolynyń 681 shaqyrymynda aq tútek boran saldarynan tańǵy saǵat 3:50-den bastap, avtokólikterdiń keptelisi oryn alyp, 400-den astam adamy bar 7 avtobýs, 45 KamAZ, 30 jeńil kólik jáne 8 Gazel júre almaı, turyp qalǵan edi. Sol kúni keshke qaraı 312 adam evakýasııalanyp, onyń 28-i Taskesken aýylyndaǵy aýrýhanaǵa, 40-y Y.Altynsarın atyndaǵy orta mektepke, 55-i - Aqtamberdi orta mektebine, 19-y - kolledjge, 60-y - Taskesken aýylynyń turǵyndaryna, 70-i - «Áıgerim» kafesine ornalastyrylyp, 40 adam Úrjar aýylyndaǵy úılerine jetkizilgen-di. Kóliginiń qaýipsizdigine alańdap, evakýasııalaýdan bas tartqan jolaýshylarǵa jergilikti atqarý organdary ystyq tamaq pen kólikter úshin janarmaı berýdi uıymdastyrǵan bolatyn.
Ishki mınıstrliginiń Tótenshe jaǵdaılar komıtetiniń resmı ókili Nursultan Nurahmetov 21 qańtardaǵy saǵat 11-degi jaǵdaı boıynsha 80 kólik áli de jolda turǵandyǵyn, avtobýstar Taskesken aýylyna jetkizilgen jolaýshylardyń kútip otyrǵandyǵyn, qar tazalaý jumystaryna 100 maman men 41 tehnıka jumyldyrylǵanyn habarlaǵan edi. Biz mán-jaıdy bilmek nıetpen uıaly telefon arqyly kesheden beri qar qursaýynda qalǵan jolaýshylardyń qasynda júrgen Úrjar aýdany ákiminiń orynbasary Serik Sádýaqasovqa habarlasyp, qysqasha suhbat aldyq.
-Jol ashyldy dep estidik. Barlyq kólik jolǵa shyǵyp ketti me?
-Jol ashyldy. 11 avtobýs ta О́skemenge qaraı jolǵa shyqty. Avtobýstaǵy jolaýshylar túnde Taskesken aýylyndaǵy mektepter men kolledjge, emhanaǵa, Mádenıet úıine ornalastyryldy. Qalǵan jolaýshylar uzyn sany 153 adam Teskesken aýylyna jetkizildi. Tańerteń kólik uıymdastyryp, jolaýshylardy tórt avtobýspen toqtap qalǵan jerlerine ákelip, avtobýstaryna otyrǵyzdyq. Qazirgi ýaqytta bul jerde 5 rotor, 2 greıder men 3 shynjyr tabandy tıegish jumys istep jatyr. Kólikterdi kezek-kezegimen jiberip jatyrmyz. Shamamen 10-14 máshınedeı bar.
- Keshe avtobýstaǵy jolaýshylardyń biriniń «24 saǵat boldy. Kómek suraımyz. Jol joq. MChS qaıda? Televızordan kórgende áıbat. Myna jerden kóre almaı otyrmyz» degen sózi ýatsap arqyly jurtqa taraǵan bolatyn.
-Rasynda, keshegi kún jolaýshylar úshin de, biz úshin de aýyr boldy. Tynym tappadyq. Kólikterin tastap jolaýshylardyń kólikteriniń ot alýyna kómektestik. Túnde solıarkasy bitken kólikterge Úrjar aýdanynyń ákimi bólgen Tıgachpen «Qazmunaıgazdan» solıarka alyp berdik. Taskesken aýylynyń jastaryna erekshe alǵysymyzdy bildirgimiz keledi. Olar óz erikterimen keshe 16 tehnıka shyǵardy. Eki snegohodpen tamaq jetpeı qalǵan adamdarǵa tamaq jetkizdi. Maqanshydan arnaıy kelgen áskerı bólim qyzmetkerlerine de alǵysymyz sheksiz. Áskerı bólimnen tórt máshınemen 20 adam keldi. Halyqty túnimen tasyp, kólikterine aparyp, ákelip otyrdy. О́zderimen birge 100 bólke nan, ystyq shaı ákelipti. Úrjar aýdanynyń ákimdigi de jolaýshylarǵa 60 kelideı kolbasa, 100 bólkeden astam nan, sý jetkizdi. Taskesken aýylynyń ákimshiligi de kómektesti. Árıne, adam kóp boldy. Keıbir jolaýshylardyń narazylyǵyn túsinemiz. Eń bastysy, halyq dalada qalǵan joq. Qonǵan mekemelerdiń barlyǵynda ystyq tamaq uıymdastyrdyq. Tańerteń barlyq jolaýshylarǵa sháıin berdik.
- Bilýimizshe, respýblıkalyq mańyzy bar «Almaty-О́skemen» joly «Qazavtojol» mekemesine qaraıdy. Joldyń tazalyǵyna osy mekeme jaýapty. Degenmen jolaýshylar tarapynan qardyń durys tazalanbaýyna qatysty kóp syn aıtyldy.
-«Qazavtojoldyń» tehnıkalarynyń jetispeýshiligi baıqalǵany ras. Keshe bir rotor men bir greıder ǵana boldy. Greıderdiń ózi qaıta-qaıta batyp, ázer jumys istedi. Qalǵan tehnıkalar Úrjar, Aıagóz, Jarma aýdandary men О́skemen qalasynan keldi.
-Jolaýshylar arasynda úsik shalǵan, aýyryp qalǵan adamdar bolǵan joq pa?
- Abyroı bolǵanda, mundaı faktiler tirkelgen joq. Qan qysymy kóterilgen jolaýshylar boldy. Olardy Taskeskenniń bas dárigeri qarap, em-domyn jasady. Aýdannyń bas dárigeri de, áskerı bólimnen kelgen dárigerler de jolaýshylardyń densaýlyǵyn baqylap otyrdy.
Azamat QASYM,
«Egemen Qazaqstan»
Shyǵys Qazaqstan oblysy