Sońǵy jyldary shyraıly shyǵysta sý sporty erekshe qarqynmen damyp keledi. Osydan tórt jyl buryn ózender órnektegen О́skemenniń kórikti jerinde qaladaǵy iri kásiporyndar – «Kazsınk», «Kazatomprom», basqa da alyp kombınattardyń qarjysyna úsh iri sport kesheni boı kóterdi. Sonyń biri – basseın. Basseınniń jalpy kólemi bir myń sharshy metrdi alyp jatyr. Al sport kesheniniń aýmaǵy 5343 sharshy metr. Uzyndyǵy 50 metr, bir tramplıni, 3 jáne 5 metrlik sekiretin alańy bar keshen zamanaýı talaptarǵa saı salynǵan. Mine, sońǵy tórt jyldan beri munda halyqaralyq, respýblıkalyq jarystar óte bastady. Osy oraıda Shyǵys Qazaqstan oblystyq mamandandyrylǵan sý sporty túrleri boıynsha balalar men jasóspirimder olımpıadalyq rezerv sport mektebiniń dırektory Mırhat Bolatqanulymen kezdesip, oǵan birneshe saýal qoıǵan edik.
− Bul kúnderi bizdiń mektepte bir myńnan astam bala jattyǵady, – dep bastady áńgimesin sport mektebiniń basshysy. – Tek balalar emes, qala turǵyndary da basseınge kelip, sýǵa júzedi, densaýlyqtaryn túzeıdi. Qazir mektepte sý doby, sýǵa sekirý, júzý, baıdarka jáne kanoe esý, baıdarka jáne kanoeden aǵyndy taý sýynda júzý bólimderi bar. Qalanyń syrtyndaǵy «Ellıng» baıdarka, kanoe esý bazasynda kóktem shyǵa kúzge deıin jattyǵý bir sátke de tynbaıdy. Bilimdi de bilikti 30 bapker shákirtterge sabaq beredi. Olardyń qatarynda Qazaqstan Respýblıkasyna eńbegi sińgen jattyqtyrýshylar Lıýbov Krasavına, Marııa Grıgorevany erekshe atap ótken oryndy. Olar baptaǵan shákirtter halyqaralyq, respýblıkalyq jáne oblystyq jarystarda top basynan kórinýde. Baıdarka, kanoe esýden Larısa Lýkıcheva degen tájirıbeli jattyqtyrýshymyz bar. Onyń qyzy ári shákirti Ekaterına Smırnova (tegin ózgertken) Beıjińdegi Jazǵy Olımpııa oıyndaryna qatysyp, alǵashqy ondyqtan kóringen. Qazir ol Ekaterınany 2020 jylǵy Olımpıadaǵa daıyndaýda. Sonymen birge V.Afanasenkov, M.Fılımonov, Q.Muqamedjanov ta jas urpaqqa sapaly bilim, sanaly tárbıe berýde. Sýǵa sekirý, sý dobynan, júzýden Qaraǵandy, Temirtaý qalalarynan tájirıbeli bapkerler E.Sızınsev, A.Reımandy shaqyryp, olarǵa jaǵdaı jasadyq.
− Shákirtterińiz arasynan Azııa jáne el chempıonattarynda top jarǵan sańlaqtar bar ma?
− Bıylǵy jyldyń qyrkúıeginde Ispanııada sý sporty túrlerinen 2020 jyly Tokıoda ótetin Olımpııa oıyndaryna joldama úlestiretin lısenzııalyq Álem chempıonaty ótedi. Oǵan bizden bes birdeı sportshy qatysady. Djakartadaǵy Azııa oıyndaryna qatysyp, qola medal ıelengen talantty sportshy Aleksandr Kýlıkov, tórtinshi oryndy qanaǵat tutqan Kamılla Safına, Qýanysh Erenǵaıypov, Petr Volkov, Ekaterına Smırnova baqtaryn synap kórmek. Eger qajetti upaıdy jınasa, olar Olımpıadaǵa qatysady.
− Sońǵy jyldary О́skemende sýǵa júzýden 14-15 jastaǵy, odan da kishirek balalar arasynda «Altaı juldyzy» atty respýblıkalyq týrnır ótip keledi. Ony ótkizýge ózińiz bastama kóteripsiz. Bul saıys dástúrli óte bere me?
− Sıqyry mol sý sporty bizge qaraǵanda Eýropa, muhıttyń arǵy jaǵyndaǵy elderde erekshe damyǵan. Bir ǵana mysal, aýstralııalyq Iаn Torp, amerıkalyq Felps bir Olımpııa oıyndarynda ǵana besten segizge deıin altyn alqany ýystap alǵany belgili. Rıodaǵy Olımpıadada almatylyq Dmıtrıı Balandın aıdy aspanǵa shyǵaryp, altyn alǵanda bórkimizdi aspanǵa laqtyryp shattandyq. Sol-aq eken elimiz boıynsha júzdegen ata-ana balalaryn basseınge jetektep ákele bastady. Tipti, bizdegi basseınge kelip, úıirmelerge qatysatyn balalardyń sany edáýir ósti.
Sý sporty túrlerinen Olımpıada baǵdarlamasyna 48 jıyntyq medal sarapqa salynady eken. Demek, sý sportyna elimizde erekshe nazar aýdarylýy tıis. Oblys ákimi Danıal Ahmetov sý sportynyń órkendeýine erekshe kóńil bólýde. «Altaı juldyzy» týrnıriniń ashylýyna qatysyp, bolashaq chempıondarǵa sáttilik tiledi. Alǵashqy týrnırde shákirtterimiz Nuráli Sovethanov chempıon atansa, Elızaveta Chernysheva, Nıkıta Arepev úshinshi orynǵa ıe boldy. Bıyl qarashada ótetin týrnırge chempıondardy shaqyrsaq dep otyrmyz, olar balalarmen júzdesip, sheberlik synybyn ótkizedi, tájirıbelerin bólisedi.
Sý sporty damı bastaǵannan beri О́skemenniń ózen-kólderinde, sýǵa shomylatyn jerlerde balalardyń sýǵa batyp ketýi azaıǵanyn oblystyq statıstıka basqarmasy habarlady. Demek, qala, aýdan ákimderi jyldyń tórt mezgilinde sý sportymen shuǵyldanýǵa bolatyn jabyq, ashyq basseınderdi salýǵa kóshse, utarymyz anyq. Tótenshe jaǵdaılar jónindegi departament bizdiń basseınde aýdandar men qalalardan kelgen nusqaýshylarmen sabaq júrgize bastady. Ár senbi saıyn «Úmit» balalar úıiniń, «Aq nıet» mektep-ınternatynyń balalary basseınge kelip sýda júzedi, olarǵa bilikti mamandar dáris beredi.
− Shákirtterińiz arasynda qansha sportshy elimizdiń qurama komandasyna múshe?
− Bizdiń mekteptiń 46 oqýshysy quramaǵa múshe bolyp qabyldandy. Olardyń 13-i negizgi, 2-ýi jastar, al 31-i jasóspirimder quramasynda óner kórsetýde. 7 adam halyqaralyq dárejedegi, 4-eýi sport sheberi, 31-i sport sheberligine úmitker, 22-si 1 razrıadty sportshylar. Túlekterimiz sońǵy birneshe jylda 500-ge tarta medal ıelendi. Onyń 139-y altyn, qalǵany kúmis, qola medal.
Áńgimelesken
Ońdasyn Elýbaı,
Qazaqstannyń qurmetti sport qaıratkeri
О́skemen