Túrkistanda memleket qajettiligi úshin úıleri súrilgeli jatqan turǵyndar, Qoja Ahmet Iаsaýı kesenesiniń mańaıynda týrısterge arnalǵan keshen salǵysy kelgen ákimdiktiń naryqtan áldeqaıda tómen baǵa berip jatqanyn aıtyp, aqparat quraldaryna shaǵymdanǵan bolatyn.
Qalanyń jaqsy aýmaǵy sanalatyn jerde turatyn 170-ke tarta shańyraqqa jergilikti ákimdik «jer ýchaskeleri memleketke qajet» degen habarlama jibergen. Al olardyń baspanalaryn baǵalaýda jekemenshik kompanııa naryqtan birneshe ese tómen baǵa usynypty.
Baǵamen kelispegen turǵyndar narazylyqtaryn bildirip, qala ákimdigine barǵan. Narazy jurttyń aldyna shyqqan qala ákiminiń orynbasary Tájibek Musaev turǵyndarǵa qysym kórsetilmegenin, buzylatyn úılerdiń turǵyndary bir jarym aı ishinde baspanasyn bosatýy kerektigin aıtqan. Baǵa unamasa, jurt ózine baǵalaýshyny taýyp alýǵa bolatynyn da eskertipti. Al osy máselege qatysty О́ńirlik kommýnıkasııalar qyzmetinde ótken brıfıngte Túrkistan qalasynyń ákimi Álipbek О́serbaev qurylys nysandaryna qajetti jerlerdi qaıtarý jumystary zań negizinde júrgizilip jatqanyn málimdedi. Ákimniń aıtýynsha, qazirgi tańda 98 gektar jerdi alatyn «Rýhanı-mádenı ortalyqta» qajetti jerdi daıyndaý maqsatynda memlekettiń muqtajdyǵy úshin 167 nysandy (13 kásipkerlik, 154 turǵyn úı) qaıtarý jumystary júrgizilýde. «Atalǵan 167 nysanǵa akt toltyrylyp sýretke túsirilgen. Búgingi tańda 161 nysannyń baǵalaý jumystary tolyq aıaqtaldy. Sondaı-aq bul jumystardy memlekettik satyp alý zańyna sáıkes, konkýrstyń nátıjesinde nysandardy baǵalaý jumystaryn «Ekspo osenka» JShS júrgizdi. Baǵalaý jumystary bitken 161 nysannyń búgingi tańda 91 menshik ıesiniń kelisimi alynǵan. Kelisim alynǵan nysan ıeleriniń qujattary tolyǵymen aıaqtalyp, turǵyn úı nysandaryn buzý jumystary bastalyp ketti. Onyń 13-ine buzý jumystary júrgizilýde. Al kelisimge kelmegen 40 nysannyń qujaty zańǵa sáıkes sotqa joldandy. Otyzǵa jýyq azamatpen kelisim jumystary júrgizilýde», dedi Álipbek О́serbaev. Sondaı-aq «Ákimshilik-iskerlik ortalyqqa» túsetin 672 gektardy quraıtyn jer aýmaǵynyń zań talaptaryna sáıkes, 470 gektary qaıtarylǵan.
Berilgen baǵamen kelispegen nysan ıeleri, óz taraptarynan kez kelgen lısenzııaly mekemege baǵalaý jasata alady. Eki taraptyń baǵalaý nátıejeleri sotqa joldanyp, zań talaptaryna sáıkes sheshiledi. Odan bólek, kelispegen turǵyndardyń arnaıy ótinishteri boıynsha jumys júrgizý úshin ótken jyly jeltoqsanda qala ákiminiń ókimimen qomıssııa qurylǵan. Quramynda memlekettik qyzmetkerler jáne jergilikti úkimettik emes uıymdardyń tóraǵalary men músheleri, depýtattar bar 29 adamnan quralǵan komıssııa jumys isteýde. Sondaı-aq brıfıngte qala ákimi zańǵa sáıkes memlekettiń muqtajy úshin jer qaıtarý jáne baǵalaý sharalaryna kelispegen turǵyndarmen birneshe ret túsindirme jumystary júrgizilgenin aıtyp ótti.
Ǵalymjan ELShIBAI,
«Egemen Qazaqstan»
Túrkistan