Sh.Aımanov atyndaǵy «Qazaqfılm» kınostýdııasynda túsirilgen rejısser Talǵat Temenovtiń «Bizdiń qalanyń kishkentaı hanzadasy» atty fılmi 9-18 qańtar aralyǵynda Bangladeshtiń Dakka qalasynda ótken HÚII halyqaralyq kınofestıvalinde «Eń úzdik balalar fılmi» atandy.
Talǵat Temenovtiń sońǵy túsirgen bul kınotýyndysy jalǵyzdyqtan japa shekken eki muńlyqtyń úlken qalada jolyǵysýyn, olardyń arasynda qıyndyqsyz órbigen kirshiksiz dostyq týraly baıandalady. Balalar úıiniń adasyp ketken alty jastaǵy tárbıelenýshisi Bıbol men Qarttar úıiniń ardageri Qasymhan ata kezdeısoq tanysady. Biraq bul kezdesý kezdeısoq emes – jeti jasqa qadam basqan bala jetpistegi qarttan Abaıdyń beınesin kórse, qarııa ómirdiń eń kishkentaı ókilinen tirshiliktiń maǵynasyn izdeıdi. Eki býynnyń ókili arany jalǵap jatqan jyldardyń aıyrmasyna qaramastan, birin-biri kirpik qaqqannan túsinetin jaqyn jandarǵa aınalady. Kishkentaı búldirshinniń júregine meıirimmen jol tapqan qarııa endigi jerde bala ómiriniń bir bólshegi ispetti. Qart mýzykant Qasymhanmen eresek adamdar sekildi qarym-qatynas jasaýdy úırene bastaǵan Bıbol adammen rýhanı-izgi qasıetter arqyly shynaıy baqyt tabýǵa bolatynyn túsinedi.
Fılm oqıǵasy Astana qalasy men Býrabaı eldi mekeninde ótedi. Bas keıipkerlerdiń rólin Ánýar Tóleýqajy men Qazaqstannyń eńbek sińirgen ártisi Tóleýbek Aralbaı oınaıdy.
Sondaı-aq júldeli fılmniń ssenarııin jazýǵa rejısser Talǵat Temenovtiń ózi de qatysqan, kompozıtory – Tólegen Muhametjanov, bas prodıýser – Ashat Ybyraev.
Aıgúl AHANBAIQYZY,
«Egemen Qazaqstan»
ALMATY