Investısııa jáne damý mınıstrliginiń jáne Ulttyq ekonomıka jáne qarjy mınıstrlikteriniń buıryǵymen qara jáne tústi metaldardyń synyǵy men qaldyqtaryn shetelge shyǵarýǵa eki jyl merzimge tyıym salynatyn boldy.
Aqtóbe oblysynda «Atameken» kásipkerler palatasynda Qazaqstan men Reseı memlettik shekaralary arasyndaǵy daýly jaǵdaılardyń oryn alýynyń aldyn-alý jáne eksporttyq baqylaýǵa jatatyn kólik júrgizýshileri men júk ıelerine aqparat berý maqsatynda dóńgelek ústel ótkizildi.
Qazaqstan Respýblıkasy aýmaǵynan avtokólikpen mynadaı metall túrlerin shyǵarýǵa tyıym salynady: qara jáne túrli tústi metall qaldyqtary (TN VED EAES 7204, 7404 00, 7602 00, 8548 10 210 0, 8548 10 290 0, 8548 10 910 0 kodty), sondaı-aq paıdalanylǵan jáne isten shyqqan qubyrlar, relster, temirjol tósemderi men jyljymaly quramy (kody - TN VED EAES 7302, 7303, 7304, 7305, 7306, 8607).
Alaıda tyıym salý qosyndylanǵan jáne korrozııaǵa tózimdi bolatqa (EAU EEU 7204 21 1 00 0, 7204 21 900 0 kodtary) jáne basqa (TN VED EAES 7204 29000 0 kodty) metall qaldyqtaryna qoldanylmaıdy.
Jıynǵa shaqyrylǵan Aqtóbe oblysy UQQ Shekara qyzmeti jáne oblystyń Memlekettik kiris departamentiniń laýazymdy tulǵalarynyń aıtýynsha, tyıym salý ishki naryqty shıkizatpen qamtamasyz etý jáne «kóleńkeli aınalymdy» boldyrmaý maqsatynda jasalyp otyr. О́ńirdegi metall saýdasymen aınalysatyn kásipkerler bolsa, qoldanysqa engizilgen zań aktisiniń bızneske kedergi keltiretin birneshe máselelerdiń týyndatatynyn aıtty. Atap aıtqanda, kásipkerlerdiń aldyn-ala daıyndalyp qoıylǵan metall lomdaryn shyǵaýǵa tyıym salynǵandyqtan, aıtarlyqtaı shyǵynǵa ushyraýy jáne tyıym salý avtokólik tasymalyna ǵana salynatyndyqtan, temir jol kóligimen tasýdyń qıyndyqtary bolyp otyr. Sonymen qatar, kásipkerler metalldy synamadan ótkizý jumystarynyń qolaısyzdyqtary týraly da aıtyp ótti.
«Kásipkerler metall synamalaryn anyqtaý úshin Memlekettik kiris departamentine kelip, ótinish berse bolady. Bul úshin bizde arnaıy bólim jumys isteıdi. Anyqtama arqyly kez-kelgen keden ornynan óte berýge bolady»,-dedi MKD Basqarmasy sarapshylyq baqylaý bóliminiń basshysy Orazǵalı Dáribaev. Aıta ketelik, elimizde qara jáne túrli-tústi metaldy shetelge shyǵarýǵa tyıym salý budan buryn da engizilip kelgen. Alaıda, olardyń merzimi 6 aıdan aspaǵan. Kásipkerler palatasynyń mamandary tyıym salýǵa baılanysty kásipkerlerdiń jekelegen máseleleri boıynsha quqyqtyq keńes berdi.
Temir QUSAIYN,
«Egemen Qazaqstan»
Aqtóbe oblysy