Aqtóbede bolýy múmkin kóktemgi sý tasqyny men sý basýdy boldyrmaý sharalarynyń kesheni júzege asyrylýda. 2017 jyly jergilikti organdar tıisti Jol kartasyn ázirlep, oǵan respýblıkalyq bıýdjetten 6 mlrd teńge bólindi. Nátıjesinde búginde oblys ortalyǵynan aǵyp ótetin segiz ózenniń arnasyn tazalaý, túbin tereńdetý jáne jaǵalaryn bekitýdiń aýqymdy jumystary júrgizilip jatyr.
Berdibek Saparbaev Qarǵaly, Elek, Sazdy jáne Butaq ózenderinde júzege asyrylyp jatqan tasqynǵa qarsy sharalardyń barysymen tanysty.
Qarǵaly ózeniniń arnasyn tazalaý, túbin tereńdetý jáne jaǵasyn bekitý jumystary Sadovoe aýylynan Elek ózenine deıingi aýmaqta, sonymen qatar, Aqjar kópiriniń aýdanynda, sondaı-aq, Sazdy ózenindegi jumystar Sazdy sý qoımasynan Sáńkibaı batyr dańǵylyna deıin, Elek ózeni – Aqtóbe sý qoımasynan Qýraıly aýylyna deıin, Butaq – Aqjar-1 aýylynan Qarǵaly ózenine deıin júrgizilip jatyr.
Oblys ákimi bul jobanyń mańyzdylyǵyn atap ótip, qala ákimdigine sapaly ári ýaqytynda júzege asyrýdy tapsyrdy.
«Búgin Elek ózeniniń túbin tereńdetý jáne tazalaý jumystaryn júrgizdik. 1100 metrdi júrip óttik, 8 ekskavator jumyldyryldy. Jaqyn arada qosymsha 30 ekskavator men býldozer jáne 70-80-deı adam tartamyz», - dedi merdiger uıym ókilderiniń biri Álibek Kenjebekov.
Oblys ortalyǵynan aǵyp ótetin segiz ózenniń jalpy uzyndyǵy 118 shaqyrym. Búkil jumys osy jyly aıaqtalady dep josparlanyp otyr.
Jobany júzege asyrý 2017 jyly bolǵan sý tasqyny jaǵdaıynyń qaıtalanbaýyna múmkindik beredi. Sol kezde sý qoımalaryndaǵy sýdyń kóterilýine baılanysty sý deńgeıi shekti deńgeıge jetip, saldarynan ózen arnasy mańyndaǵy baý-baqsha ujymdary men turǵyn úı alaptaryn sý alǵan bolatyn.