Elbasy Nursultan Nazarbaevtyń Qazaqstan halqyna Joldaýynda «Pedagog mártebesi týraly» zań qabyldaý týraly shegelep aıtyldy. Prezıdent onyń sebebin de kórsetip berdi.
«Muǵalimderdi aqy tólenbeıtin qosymsha jumystarǵa kóp ýaqyt jumsaıdy. Mysaly, saılaý kezinde úgitshi jasaıdy, sabaqtan alyp senbilikke jiberedi, jınalystarda kisi tolmasa soǵan qatystyrady, bireýdiń kitaby ótpeı jatsa sony aldyrady jáne gazet-jýrnaldarǵa kúshtep jazdyrady, t.b.» dedi.
2000-jyldary qazaqtyń birtýar pedagogy, ǵalym-ustaz Qanıpa Bitibaeva apamyz Aqsýatqa keldi. Sonda osy máseleni qozǵap edi. Kóregen apamyz óz sózinde: «Muǵalimderdiń «baıy» kóp. Olar – dırektor, bilim berý bóliminiń basshysy, ákim t.b. Sondyqtan «Muǵalim mártebesi týraly» zań qabyldamaı túk te bolmaıdy» dep edi. Mine, buıyrsa Qanıpa apamyzdyń tilegi oryndalǵaly tur.
Endigi kezekte pedagogıka salasynda 34 jyl eńbek ótili bar, muǵalim, oqý isiniń meńgerýshisi, dırektor, bilim bóliminde ádistemelik kabınettiń meńgerýshisi, jańadan qurylǵan «PMPK» KMM-niń basshysy bolǵan adam retinde «Pedagog mártebesi týraly» zańǵa qatysty oı-pikirimmen bólispekpin.
Eń aldymen Prezıdentimiz atap kórsetkendeı (joǵaryda aıtylǵan), aqy tólenbeıtin qosymsha júktemelerden muǵalimderdi bosatý kerek. Ekinshiden, muǵalimderdiń alańsyz sabaqqa daıyndalyp, oqý-tárbıe jumysymen ǵylymı shyǵarmashylyqpen aınalysýyna mektep ákimshiligi jaǵdaı jasaýy qajet.
Ár muǵalimde EǴU (eńbekti ǵylymı turǵyda uıymdastyrý) bolýy, ıaǵnı sabaq kestesin jasaǵanda bir kúndi osyǵan arnaý, pán kabınetteriniń materıaldyq bazasyn jaqsartý, mektepishilik semınarlar, ǵylymı konferensııalar ótkizý, mektep muǵalimderiniń pedagogıka salasy boıynsha ótetin aýdandyq, oblystyq, respýblıkalyq jáne halyqaralyq olımpıadalarǵa, túrli baıqaýlar men konkýrstarǵa qatysýlaryna jaǵdaı jasaý, muǵalimniń eńbegin sońǵy nátıje boıynsha baǵalaý, ıaǵnı oqýshysy aýdandyq, oblystyq, respýblıkalyq, halyqaralyq olımpıadalardan júldeli oryn alǵan ustazdardy jumys ótiline qaramaı kategorııasyn kóterý jáne marapattaý. Úshinshiden, ekonomıkalyq jaǵdaı túzelgen kezde muǵalimderdiń aptalyq júkteme sabaqtaryn 18-den 14-ke deıin tómendetý, 25 jyl jumys ótilinen keıin jeńildikpen zeınetkerlikke shyǵarý qajet.
Pedagogtardy turǵyn úıiniń kólemine qaraı kómirmen, elektr energııasymen tolyq qamtamasyz etý, dárigerlik qaraýdan tegin ótkizý qolǵa alynsa deımiz. Qazirgi kezdegi kommýnaldyq qyzmet aqysy bir tonna kómirge de jetpeıdi.
Sonymen birge muǵalimderdiń eńbekaqylary elimizdegi ortasha eńbekaqydan joǵary bolýy qajet.
«Sanany turmys bıleıdi», dep kezinde K.Marks tegin aıtpaǵan bolar. Eger muǵalimderdiń áleýmettik jaǵdaıy jaqsaryp, turmysy túzelse, olarǵa erkindik berilse, ustazdar ózderiniń atyna daq túsirmeı, elimizdiń erteńi – bolashaq urpaqqa sapaly bilim, sanaly tárbıe berý jolynda aıanbaı eńbek etetinderine kámil senemin.
Erjan QUTTYBAEV,
Bilim berý isiniń úzdigi, Tarbaǵataı aýdandyq máslıhatynyń depýtaty
Shyǵys Qazaqstan oblysy