Oral qalasyndaǵy Nazarbaev Zııatkerlik mektebinde «BatysBilimTalks» lektorııi ótti. V ret ótkizilip jatqan bilim berý lektorııi «О́ndiristik revolıýsııa jaǵdaıynda adamı kapıtal men bilim berý júıesine qoıylatyn jańa talaptar» taqyrybyna arnaldy.
Is-sharanyń bas spıkeri – «Nazarbaev Zııatkerlik mektepteri» derbes bilim berý uıymdarynyń Basqarma tóraǵasy Kúlásh Shámshıdınova boldy. Bul sharaǵa Batys Qazaqstan oblysynyń ákimi Altaı Kólginov jáne óńirdegi bilim berý júıesiniń qyzmetkerleri qatysty.
Pedagogtarǵa arnalǵan lektorııde el bolashaǵy jastardyń bilim irgetasy mektepte qalanatyndyǵyna basa mán berildi. О́z sózinde otandyq jáne álemdik tájirıbeni ushtastyrǵan Kúlásh Shámshıdınova qazirgi urpaq tárbıesinde jattandy bilimnen góri ómirde praktıkalyq qoldana alatyn naqty tájirıbe, sheshim qabyldaý mańyzdy ekenin aıtady. Taıaý bolashaqta kóptegen mamandyq joıylyp, dene eńbegin aqyldy robottar atqaratyn tusta ár azamatqa «dúnıeniń ketigin taýyp, kirpish bolyp qalaný» - ońaı sharýa bolmaıdy. Ozyq tehnologııa, jasandy ıntellekt kezeńinde oqýshynyń shyǵarmashylyq qabiletin damytý qajet.
- Bilim degenińiz – aqparat. Oǵan qol jetkizýdiń joly da ártúrli. Sondyqtan mektep qabyrǵasynda balaǵa qajetti aqparatty ózi izdep tabýyna jáne ony ózi óńdep, paıdasyna jarata bilýge úıretý qajet. Búgingi mekteptiń basty mindeti – osy, - deıdi Kúlásh Shámshıdınova.
Kezdesýde sóz alǵan Batys Qazaqstan oblysynyń ákimi Altaı Kólginov óńirdegi pedagog kadrlardyń bilimin jetildirý máselesine toqtaldy. «Kitap oqý, kún saıyn ózin-ózi jetildirip, bilimin kóbeıtip otyrý – búgingi adamǵa, mamanǵa qoıylatyn eń basty talap» dedi óńir basshysy. Batys Qazaqstan kolledjderinde bilim sapasyn arttyrýǵa basa mán berilýde. Máselen, Joǵary agrarlyq-tehnıkalyq kolledjiniń mamandary BIM tehnologııalaryn engizý boıynsha fındik áriptesterimen tájirıbe almasyp qaıtty.
- Bul jumystar 4 baǵytta júzege asady. Olar – gýmanıtarlyq, ındýstrııalyq, medısınalyq jáne sporttyq baǵyttar. Búgingi tańda osy baǵyttarǵa kadr daıarlaıtyn kolledjderdiń bilim deńgeıin kóterý úshin otandyq jáne sheteldik seriktester izdestirilip jatyr. Máselen, pedagogıkalyq kolledjde 2 myńnan asa stýdent bilim alady. Olardyń deni erteń-aq oqý bitirip, mektepte bala oqytady. Al balanyń bilim deńgeıi tikeleı muǵalimniń bilim-biligine baılanysty. Sondyqtan osyǵan basa mán berýimiz qajet, - deıdi Altaı Kólginov.
Búgingi lektorııge qatysqan mektep dırektorlary, mektepke deıingi jáne kásibı bilim berý oqý orny basshylary osy jıynda aıtylǵan baǵaly oı túıinderin óz ujymdarynda taratatyn bolady. Alys aýyldar mektepteri úshin beınedárister ázirlenip, taratylmaq.
Qazbek QUTTYMURATULY,
«Egemen Qazaqstan»
Batys Qazaqstan