Memleket basshysynyń tapsyrmasy boıynsha tórtinshi áleýmettik bastamasy sheńberinde kásipkerlikti damytý arqyly xalyq tabysynyń artýyn qamtamasyz etý úshin ózin-ózi jumyspen qamtyǵan jáne jumyssyz xalyqqa mıkrokredıt berý júzege asyrylýda. Bul týraly Úkimet saǵatynda Eńbek jáne xalyqty áleýmettik qorǵaý mınıstri M.Ábilqasymova málimdedi.
«2018 jyly mıkrokredıt berý baǵdarlamasyn qarjylandyrý 20 mlrd teńgege, onyń ishinde aýyldarda 14 mlrd, qalalarda 6 mlrd teńgege ulǵaıdy. Qosymsha bólingen qarajatty esepke alǵanda, mıkrokredıt berýdiń jalpy somasy 62 mlrd teńgeni qurady. Onyń ishinde 45 mlrd teńge aýyldyq jerlerge jáne 17 mlrd teńge qalalyq jerlerge jiberildi. 2018 jylǵa arnalǵan mıkrokredıtpen qamtý jospary 14 myń adamdy qurady», dedi mınıstr.
Onyń aıtýynsha, mıkrokredıtter mıkrobıznesti ashý jáne bar bıznesti keńeıtý maqsatynda beriledi.
«2018 jyly barlyǵy 14 053 mıkrokredıt berildi, onyń ishinde aýyldarda - 12760, qalalarda - 1293 mıkrokredıt berildi. Aýyldarda mıkrokredıt berýdiń ortasha mólsheri 3,5 mln teńgeni, al qalalarda 11 mln teńgeni quraıdy. Berilgen mıkrokredıtter ishinen Start-up jobalardy qoldaýǵa 9772 mıkrokredıt, ıakorly kooperasııanyń jańa baǵytyn damytýǵa 1024, jeke isti keńeıtýge 3257 mıkrokredıt berildi. Osylaısha, Tórtinshi áleýmettik bastamany iske asyrý tolyq qamtamasyz etildi», dedi M.Ábilqasymova.