Búgin Shveısarııada dúnıejúzilik ekonomıkalyq Davos forýmy bastaldy. Davos forýmyna 110 elden kelgen 3 myńnan astam saıasat, qoǵam qaıratkerleri, ǵalym jáne úkimettik emes uıym ókilderi qatysady. Bıylǵy forým «Jahandaný 4: Tórtinshi ındýstrııalyq revolıýsııa dáýirinde jahandyq arhıtektýrany qalyptastyrý» taqyrybyna arnalǵan.
Jıyn baǵdarlamasy ártúrli taqyryptardy qamtıdy. Baǵdarlama alty synı dıalogqa: álemdegi geosaıasatqa, ekonomıkanyń bolashaǵyna, ónerkásiptik júıeler men tehnologııalyq saıasatqa, adam kapıtaly men qoǵamdy kótermeleýge, sondaı-aq jahandyq ınstıtýsıonaldyq reforma jasaýǵa baǵyttalǵan.
«Jahandanýdyń tórtinshi tolqyny adamdarǵa negizdelip, ınklıýzıvti jáne turaqty bolý kerek. Biz «tórtinshi ındýstrııalyq revolıýsııanyń» áseri men geoekonomıkalyq jáne geosaıası kúshterdi qaıta qurý nátıjesinde týyndaǵan úlken ǵalamdyq turaqsyzdyq kezeńine kirip otyrmyz. Davosqa qatysýǵa qyzyǵýshylyq tanytqan toptar osy máselelerdi sheshý úshin atsalysady dep oılaımyz», dedi dúnıejúzilik ekonomıkalyq forýmnyń negizin qalaýshy jáne bas atqarýshy professor Klaýs Shvabt.
Forýmǵa 60-tan astam eldiń memleket basshysy men premer-mınıstri qatysady. Atap aıtqanda Japonııa premer-Mınıstri Sındzo Abe, Germanııa kansleri Angela Merkel, Qytaı tóraǵasynyń orynbasary Van Sıshan, Brazılııanyń jańa prezıdenti Jaır Bolsonarý, Italııa premer-mınıstri Djýzeppe Konte, aǵylshyn taǵynyń ekinshi kezektegi murageri, hanzada Ýılıam, Ispanııa premer-mınıstri Pedro Sanches, Aýǵanstan prezıdenti Ashraf Ganı, Irak prezıdenti Barham Saleh, Armenııa premer-mınıstri Nıkola Pashınıan, Ázerbaıjan prezıdenti Ilham Álıev keledi. Budan basqa, BUU jáne onyń bólimsheleriniń, HVQ, NATO, Dúnıejúzilik bank, DSU jáne basqa iri halyqaralyq uıymdardyń basshylary qatysady.
Jıynnyń eń jas qatysýshy 16 jastaǵy - Ońtústik Afrıkanyń jabaıy janýarlar ómirin sýretke túsirýshi fotograf Skı Meıker. Al 92 jastaǵy klımattyń ózgerýine álem nazar aýdarý úshin óz jumysyn tıimdi paıdalanǵan áıgili telejúrgizýshi Devıd Attenboro eń qart qatysýshysy.
Ýaqytsha bıýdjet daǵdarysy saldarynan AQSh delegasııasy forýmǵa qatyspaıdy. Bul týraly Aq úıdiń resmı ókili Sara Sanders málimdedi. Sondaı-aq Breksıtten basy qatqan Ulybrıtanııa premer-mınıstri Tereza Meı, Parıjdegi «sary kúrte kıgenderdiń» ereýilderine baılanysty eldegi ishki jaǵdaıdy qolǵa alǵan Fransııa prezıdenti Emmanýel Makron bul forýmǵa kelgen joq.
Forým memleket basshylary úshin túrli kezdesýler, qarym-qatynas jáne kelissózder júrgizýge múmkindik beredi. Mysaly Reseı Energetıka mınıstri Aleksandr Novak forýmda Saýd Arabııasynyń Energetıka mınıstri Halıd ál-Falıhpen munaı naryǵynda OPEK+ kelissózin júzege asyrýdy talqylaıtynyn habarlady. Sondaı-aq, Davosta Taıaý Shyǵystaǵy, onyń ishinde Lıvııa men Sırııadaǵy jaǵdaı boıynsha birneshe pikirtalastar ótedi. BUU-nyń Sırııa máseleleri boıynsha arnaıy ókili Geır Pedersen Sırııa taqyrybyn jabyq kezdesýde múddeli elderdiń ókilderimen talqylaıdy. Jaqynda ol Damaskide bolyp Úkimetpen kezdesti, oppozısııa delegasııasymen jeke áńgimelesti.
Búkilálemdik ekonomıkalyq forým halyqaralyq áriptestikti damytý maqsatynda uıymdastyrylady. 1971 jyly qurylǵan forýmǵa 1000-nan astam iri kompanııalar men álem memleketteri múshe.
Mádına JÁLELQYZY,
«Egemen Qazaqstan»