Almatyda ústel tennısinen ulttyq quramaǵa irikteý aıasynda «TOP-12» respýblıkalyq týrnıri aıaqtaldy. Bul týraly Olympic.kz. jazdy.
Erler arasynda óskemendik Denıs Joldýev tuǵyr bıiginen kórindi. Oraldyq Aıdos Kenjeǵulov kúmis júldeger atansa, Shymkent qalasynyń túlegi Bekulan Jaman qola medalǵa qol sozdy.
Áıelder arasynda Anastasııa Lavrovaǵa teń keler eshkim bolǵan joq. Ol fınalda qaraǵandylyq Záýresh Aqashevany utty. Úshinshi oryn shymkenttik Malıka Ilhamjanovanyń enshisinde.
«Týrnır joǵary deńgeıde ótti. Alǵashqy segizdiktegi sportshylardyń oıyny óte qyzyq bolǵanyn aıta ketý kerek. Denıs Joldýev óz myqtylyǵyn dáleldep keledi. Onyń árbir kezdesýi jankúıerge úlken áser syılaǵany sózsiz. Al áıelder arasynda fınaldyq jupty quraǵan Záýresh Aqasheva men Anastasııa Lavrova bir-birine aldyrmaıtyn úzdikter. Ekeýiniń arasyndaǵy kezdesýler únemi tartysqa toly bolady», - deıdi komanda bapkeri Dmıtrıı Pereverzev.