Qyzylorda oblysynda ulttyq salt-dástúrdi nasıhattaıtyn «Tal besikten jer besikke deıin...» jobasy júzege asyrylyp jatyr.
Oblystyq «Rýhanı jańǵyrý» ortalyǵynyń mamandary byltyr aımaqtyń Ardagerler keńesi, saıası partııalar jetekshileri men úkimettik emes uıym múshelerimen kezdesip, bul baǵytta kóptegen máseleni tarazyǵa salǵan edi.
«Joba aıasynda ulttyq salt-dástúrlerdi nasıhattaı otyryp, búgingi ýaqyt talabyna sáıkes keletin dástúrlerdi jańǵyrtýdy qolǵa almaqpyz. Sondaı-aq, qazirgi toı ótkizý dástúrine de pragmatıkalyq kózqaraspen qaraǵanymyz jón», - dedi oblystyq «Rýhanı jańǵyrý» ortalyǵynyń basshysy Nurlybek Myńjas.
Ortalyq mamandary budan basqa da birqatar jańa jobany qolǵa almaq. Atap aıtar bolsaq, úsh tilde «Qorqyttyń danalyq sózderi», «Syr boıynyń sakraldy eskertkishteri: mıfter, hıkaıattar, ańyzdar» jınaǵy, «Alash qaıratkerleriniń Aqmeshit-Qyzylorda kezeńi», «Qorqyt ata kitaby» birneshe nusqa boıynsha qaıta aýdarylyp, jaryqqa shyǵady. Bul eńbekterdiń barlyǵy Elbasynyń «Uly dalanyń jeti qyry» maqalasyna oraı júzege asatyn bolady. Jobalar «Uly dalanyń jeti qyry» maqalasynyń «Túrki áleminiń genezısi», «Uly dalanyń uly esimderi», «Dala folklory men mýzykasynyń myń jyly» arnaıy jobalary aıasynda oryndalady.
Baqtııar TAIJAN,
«Egemen Qazaqstan»
Qyzylorda oblysy