Byltyr qaýipti dertke 70-ke jýyq názikjan shaldyqsa, 20-sy qaterli isiktiń qurbanyna aınalǵan.
«Jatyr moıny qaterli isigi – búgingi tańda eń jıi kezdesetin qaýipti dertterdiń biri. Álem boıynsha bul aýrý sút bezi obyrynan keıin ekinshi orynda tur. Jyl saıyn dúnıe júzinde jarty mıllıonǵa jýyq qyz-kelinshek atalǵan qaterli isikke shaldyqsa, jartysyna jýyǵy kóz jumady. Elimizde ortasha eseppen alǵanda kún saıyn jatyr moıny obyry eki qazaqstandyq áıeldiń ómirin úzedi» deıdi oblystyq Onkologııalyq dıspanserdiń bas dárigeriniń orynbasary Oleg Dýdıak.
Onyń aıtýynsha, 2018 jyly jatyr moıny obyrymen dıspanserlik esepke 51 názikjandy alynǵan. Olardyń barlyǵy qaterli isiktiń alǵashqy kezeńderine shaldyqqan. 2017 jyly 57 áıel esepke qoıylypty.
Dárigerler memleket qarajatyna júrgiziletin skrınıngtiń ózine adamdardyń tekserilýge kele bermeıtinine alańdaıdy. Máselen, atalǵan tekseris tizimine kiretin jatyr moıny obyryn anyqtaý quny 3721 teńgeni quraıdy eken. Al skrınıng aıasynda 30 ben 70 jas aralyǵynda áıelder úshin bul shara 4 jylda bir ret tegin júrgiziledi.
Onkologııalyq dıspanserdiń skrınıng boıynsha jaýapty mamany Kúlzıpa Sandybaeva 2018 jyly ótkizilgen skrınıng barysynda 716 naýqas anyqtalyp, 673-i dıspanserlik esepke alynǵanyn jetkizdi. Olardyń 17-si jatyr moıny obyryna shaldyqqan. 15 áıeldiń derti qaterli isiktiń – birinshi, al ekeýiniki ekinshi satysynda tirkelgen.
«Skrınıngtiń maqsaty – obyrdy alǵashqy kezeńderinde anyqtaý. Bul dertten tolyq aıyǵýǵa múmkindik beredi. Densaýlyǵyn teksertemin degen jandar úshin aptalyq aıasynda tegin «Ashyq esik» kúnin uıymdastyrýdy josparlap otyrmyz» deıdi ol.
О́mir ESQALI,
«Egemen Qazaqstan»
Soltústik Qazaqstan oblysy