Serbııanyń Sombor qalasynda ótken «Ulttar kýbogi» týrnırinde jas boksshy Alýa Balqybekova chempıon atandy. Ulttyq qurama sapyndaǵy alǵashqy iri jeńisine qol jetkizgen ol Olympic.kz saıtyna shaǵyn suhbat bergen bolatyn.
Serbııadaǵy týrnırge álemniń úzdik boksshylary jınaldy. Men 48 kelide el namysyn qorǵadym. Týrnır barysynda úsh kezdesý ótkizip, jeńiske jettim. Fınalda reseılik Iýlııa Chýmgalakovadan basym túsip, esemdi qaıtardym desem bolady. О́ıtkeni, tap osy boksshydan jeńilip qalǵanym bar. Jalpy alǵanda, bul jyldyń shymyldyǵyn ashatyn týrnır. Aldaǵy iri jarystar aldyndaǵy úlken daıyndyq ispetti. Qazaqstan quramasynyń jalpy esepte birinshi oryn alǵany da qýantady. Jeke bapkerim jetistigime marqaıyp jatyr. Endi budan da úlken jarystarda top jarǵym keledi, - deıdi Alýa.
Alýa Balqybekova 48 kelide elimizdegi ekinshi nómirli boksshy sanalady.
2015 jyly bas komandanyń qosalqy quramyna qabyldandym. Bul men úshin úlken jetistik edi. 2017 jyly el chempıony atanyp, birinshi nómirli boksshy bolǵanym ras. Biraq bir jyldan soń Áıgerim Qasenaevaǵa jol berdim. Degenmen, bas komanda sapynda jeńiske jetý arqyly ózime degen senimim nyǵaıdy. Bul meniń eresekter arasyndaǵy alǵashqy iri jeńisim, - deıdi boksshy.
Jas sportshy Qazaqstannyń boksshy qyzdarymen barlyǵy da sanasatynyn jetkizdi. Alýanyń aıtýynsha, bizdiń komandanyń jeńisti dástúri bar.
Boksshy qyzdarymyzdyń álem sportshylary aldyndaǵy bedeli joǵary. О́ıtkeni, bizde jeńispen órilgen dástúr bar. Nazym Qyzaıbaı men Jaına Shekerbekova álem chempıonattarynda kózge túsip júr. Lázzat Kúngeıbaeva men Valentına Halzovanyń da orny bólek. Dına Jolamannyń jetistigi óz aldyna bir tóbe. Sondyqtan, iri jarystar kezinde bizben barlyǵy da sanasady, - deıdi Alýa Balqybekova.
Serik Qonaqbaev pen Serik Sápıevti úlgi tutatyn jas boksshy aldaǵy ýaqytta Azııa chempıonaty men Marına Volnova atyndaǵy týrnırge qatysýdy josparlap otyr.