О́tken jyly Qytaıdaǵy ekonomıkalyq ósim 30 jyldaǵy mınımým kórsetkishke deıin baıaýlady.
IJО́-niń ósý qarqyny 12 aı ishinde tómendep, ortasha eseppen alǵanda 6,6%-dy qurady. Aıta keteıik, bul kórsetkish resmı boljamdarmen sáıkes keldi. Ishki jalpy ónim 13 trıllıon dollardan asty.
Qytaıdyń memlekettik statıstıkalyq basqarmasy ekonomıkalyq jaǵdaıdyń nasharlaýyn QHR men AQSh arasyndaǵy saýda-sattyq soǵyspen baılanystyrady.
«AQSh pen Qytaı arasyndaǵy saýda daýlary osy eki eldiń, basqa da memleketterdiń ekonomıkasyna teris áserin tıgizedi. Árıne, biz túrli sharalar qoldanyp, damýǵa qol jetkizdik. Qytaı men AQSh yntymaqtastyǵy ekonomıkalyq turǵydan alǵanda eki tarapqa da paıdaly, al konfrontasııa jaǵdaıynda ekeýi de utylady. Negizi QHR men Qurama Shtattardyń yntymaqtastyǵynyń tıimdi jaǵy kóp, al aradaǵy kelispeýshilik álemniń barlyq memleketterine áser etedi», - dep málimdedi Memlekettik statıstıkalyq basqarma basshysy Nın Szıchje.
О́tken jyly Qytaı men AQSh arasynda saýda-sattyq soǵysy órship ketti. Onyń eń sońǵy kórinisi - Qurama Shtattardyń Qytaıdan kelgen 200 mıllıard dollarlyq taýarǵa 10 paıyzdyq baj salyǵyn engizýi. Buǵan jaýap retinde Pekın amerıkandyq ónimderdi 60 mıllıard dollar kólemindegi ónimdi jetkizý boıynsha tarıfterdi 5 jáne 10 paıyzǵa kóterdi.
Eki el kóshbasshysy jeltoqsanda úsh aılyq beıbit kelisimge keldi.