Almaty oblysy aýmaǵynda «Servıstik ákimdik» qyzmetiniń júzege asqanyna asa kóp ýaqyt bola qoıǵan joq. О́tken jyldyń kókteminde iske qosylǵan ushqyr joba qazir memlekettik qyzmet salasyndaǵy tıimdi bastama retinde baǵalanyp otyr.
Jalpy «Servıstik ákimdik» jobasy memlekettik qyzmet kórsetetin mekemelerdi bir jerde shoǵyrlandyrý men azamattarǵa qolaıly jaǵdaı jasaýǵa arnalǵandyǵymen qundy. Iаǵnı, bul jerde atqarýshy bılik ókilderiniń jergilikti turǵyndarmen betpe-bet otyryp jumys jasaýyna esh kedergi joq. Onyń ústine sharýasy qaýyrt adam qalanyń túkpir-túkpirinde ornalasqan bólimderdi izdep sabylmaı, qajetti qyzmeti bir ǵımaratyń ishine taýyp, isin qınalmaı-aq bitirýine qol jetkizdi.
Qartal aýdanynyń ortalyǵynda bastaý alyp, qazirgi kúni tutas el boıynsha úlgi retinde usynylyp otyrǵan «Servıstik ákimdikke» aýdannyń barlyq memlekettik qyzmet túrin kórsetetin bólimderi shoǵyrlanýda. Úshtóbedegi uıadaı ǵana ǵımaratqa qajetti qyzmettiń 41 túrin usynatyn Úshtóbe qalasy ákiminiń apparaty, bilim berý, sáýlet jáne qala qurylysy, jer qatynastary, jolaýshylar tasymaly jáne avtomobıl joldary bólimderi, Qaratal aýdany ákimdiginiń Jumyspen qamtý ortalyǵy sııaqty naǵyz jurt jıi izdeıtin resmı organdar qonystandy. «Servıstik ákimdiktiń» taǵy bir ereksheligi, bul jerde ádettegideı kilem tóselgen dáliz boıyna qazdaı tizilgen emen esikti kabınetter joq. Barlyq atqarýshy organnyń qyzmetkerleri Open space ádisimen, ashyq kabınalarda otyryp jumys isteýde.
Jaqynda Almaty oblysyna jumys saparymen kelgen Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Qaratal aýdanyna arnaıy baryp, jumys barysyn kózben kórgen.
- Open space rejımindegi ashyqtyq prınsıpin qatań ustanatyn mundaı nysandardy barlyq jerlerde ashýymyz kerek. Árıne, Halyqqa qyzmet kórsetý ortalyqtary bar kezde, taǵy qyzmet kórsetý ortalyqtaryn ashýdyń qajeti qandaı degen suraq týyndaýy múmkin. Bul suraqta oryndy. Degenmen, memlekettik qyzmetterdi kórsetý salasy óz aldynda turǵan máselelerdi sheship, damýdyń joǵary satysyna jetken joq. Kóptegen memlekettik qyzmetterdi alý úshin jergilikti atqarýshy organdardyń ǵımarattaryna barý mańyzdylyǵyn áli de joǵaltpady. Osyǵan baılanysty, memlekettik qyzmetterdi alýshylar úshin osyndaı «Servıstik ákimdik» uıymdastyrý kajet bolyp otyr, - dedi agenttik tóraǵasy.
Aıtpaqshy, Úshtóbe qalasyndaǵy pılottyq bastama iske qosylǵaly beri atqarýshy organ ókilderi turǵyndarǵa 4878 memlekettik qyzmet túrin kórsetip úlgeripti. Bul – «Servıstik ákimdik» jobasynyń tıimdiligine naqty dálel.
Qalmahanbet MUQAMETQALI,
«Egemen Qazaqstan»
Almaty oblysy