Azat Perýashev Qazaq Respýblıkasy ataýyn qaıta engizýdi usyndy – bul jóninde «Aq jol» partııasynyń tóraǵasy búgingi ótken Májilistiń plenarlyq otyrysynda Úkimet basshysynyń atyna depýtattyq saýal joldady.
Onda «1920 jyly tamyz aıynda Moskvada SovNarKom shekara máselesin jan alysyp talqylaǵanda, Álimhan Ermekov birneshe ret baıandama jasady. Osy jumysqa Ahmet Baıtursyn, Álıhan Bókeıhan jáne basqa da qazaq delegasııasynyń 12 múshesi tikeleı qatysty.
Sonda olar arnaıy ekspedısııalarda jınastyrǵan ǵylymı derekterge súıenip, qazaq jeriniń tutastyǵyn dáleldep shyqty. Nátıjesinde, sol jyly Avtonomdy Keńestik Respýblıka qurylyp, 1925 jyldan bastap oǵan halqymyzdyń tól «Qazaq» degen ataýy berildi» delingen.
«Kelesi, 2020 jyly memlekettilik turǵysynan bolashaq Táýelsiz Qazaqstannyń irgetasyna aınalǵan, KSRO quramyndaǵy Qazaq Respýblıkasynyń, naqtylap aıtamyn – Qazaq Respýblıkasynyń – qurylǵanyna 100 jyl tolady. Qazaqstan ataýymen qatar resmı túrde qoldanylýy úshin – Qazaq Respýblıkasy ataýyn qaıta engizý múmkindigin qarastyrýdy usynamyz» dep málimdedi Perýashev.
Esterińizge sala keteıik, mundaı bastamany 5 jyl buryn, «Máńgilik El» tujyrymdamasyn talqylaý barysynda Elbasy Nursultan Nazarbaevtyń ózi usynǵan bolatyn.
«Aq jol» fraksııasynyń jetekshisi: «Bizdiń oıymyzsha, Elbasymyzdyń ustanymyn iske asyratyn kez keldi. Qarany – qara, aqty – aq, qazaqty – qazaq dep ataýymyz kerek. Tipti totalıtarlyq sovet ókimeti moıyndaǵan Qazaq atyn Respýblıkamyzǵa qaıtarý – tek tarıhı ádiletti qurmetteý ǵana emes, sonymen qatar, barsha kópultty otandastarymyzdyń birligi men yntymaǵyn odan ári nyǵaıtýǵa serpin beretinine senimdimiz» dep atap ótti óz sózinde.