2019 jyl álem sportshylary úshin qarbalasqa toly bolmaq. О́ıtkeni, osy maýsymda Tokıo Olımpıadasynyń joldamalary úshin talas bastalady. Olımpıadalyq sport túrleriniń ókilderi túrli oqý-jattyǵý jıyndaryn bastap ketti. Báriniń maqsaty jalǵyz – tórtjyldyq dodasynan syrt qalmaý. Otandyq sportshylardyń reıtıngilik týrnırlerdegi múmkindigi men irikteý syndaryndaǵy áleýeti týraly maqalasyn Olympic.kz jarııalady.
Sporttyq gımnastıkanyń Qazaqstandaǵy tarıhy áride jatyr. Bizdiń elde týyp-ósip, Olımpıadada top jarǵan Valerıı Lıýkın, Nellı Kım syndy dańqty sportshylardy jankúıer umyta qoıǵan joq. Dese de, bul jeńisti dástúrdiń elimiz táýelsizdik alǵan soń aqsap qalǵany ras.
Qazaqstan egemendik alǵaly beri sporttyq gımnastıkadaǵy el abyroıyn sanaýly sportshylar qorǵady. Olımpıada oıyndaryna qatysqandar qatarynda Ernar Erimbetov pen Stepan Gorbachevtar bar. Búginde bapkerlik qyzmetke kóshken Erimbetovtiń izbasarlary joq emes. Ásirese, ótken jylǵy álem chempıonatynan soń sporttyń bul túrinen de júldege úmitti ekenimizge kóz jetkizgendeı boldyq.
2018 jyly Katar astanasy Dohada ótken álem chempıonaty biz úshin eki mańyzdy oqıǵamen este qaldy.
Birinshiden, qazaqstandyq gımnastar komandalyq týrnırde synǵa túsip, 16-shy oryn ıelendi. Bul Tokıo Olımpıadasyna joldama taratatyn basty jarys – Shtýtgarttaǵy álem chempıonatyna qatysý múmkindigin beredi.
Ekinshiden, at snarıadyndaǵy jattyǵýda baq synaǵan Narıman Kýrbanov irikteý kezeńin ekinshi orynda aıaqtap, fınalda besinshi satyǵa turaqtady. Bul sońǵy jyldary Qazaqstan gımnastary kórsetken eń úzdik nátıje ekeni sózsiz.
2019 jyly gımnastardy qandaı doda kútip tur? Tokıo Olımpıadasyna joldama alý múmkindigi kimderde basym? Osy suraqtarǵa jaýap izdep kórelik.
2020 jylǵy jazǵy Olımpıada oıyndaryna irikteý jarysyna retinde álem kýbogi kezeńderi tańdap alynǵan. Naqtylaı túsetin bolsaq, Germanııanyń Kotbýs (2018, 2019), Avstralııanyń Melbýrn (2019,2020), Ázirbaıjannyń Baký (2019), Katardyń Doha (2019,2020) qalalarynda sporttyq gımnastıkadan álem kýbogi kezeńderi ótedi.
Alǵashqy lısenzııalyq týrnır byltyrǵy jyldyń aıaq tusynda Kotbýsta ótip, qazaqstandyq Mılad Karımı qol tirep sekirýden úzdik bestikke endi. Bul Mıladtyń Olımpıadaǵa aparar joldaǵy tyrnaqaldy tabystarynyń biri.
Sporttyq gımnastıkadan 2019 jyldyń alǵashqy resmı jarysy Avstralııada uıymdastyrylady. 12-18 naýryz aralyǵynda Melbýrnde ótetin álem kýbogi kezeńinde Narıman Kýrbanov pen Mılad Karımıdiń júldege talasý múmkindigi bar. Lısenzııaǵa qol jetkizý úshin olarǵa mindetti túrde júldeli orynnan kóriný qajet.
Olımpıada oıyndaryna deıin jalpy esebi 8 álem kýbogi kezeńi ótetinin esterińizge salamyz.
Álem kýbogi kezeńderinen bólek, Olımpıada joldamasy Azııa chempıonattarynda da sarapqa salynady. 2019 jyldyń mamyr aıynda Mońǵolııanyń Ulan-Batyr qalasynda, 2020 jyly Tokıoda ótetin sary qurlyq dodasy da lısenzııalyq týrnırler sanatynda. Azııa chempıonatynyń qorytyndysy boıynsha, kópsaıystan 1-8 orynǵa engen sportshylardyń Olımpıadaǵa qatysý múmkindigi zor. Osy oraıda, Mılad Karımıden úlken úmit kútemiz.
Qazaqstannyń komandalyq esepte 2020 jylǵy Olımpıada oıyndaryna qatysýy týraly másele Germanııada ótetin álem chempıonatynda túbegeıli anyqtalady. 4-13 qazan aralyǵynda Shtýtgardta jalaýy jelbireıtin doda álem úzdikteriniń basyn qospaq. Komandalyq synda Tokıo Olımpıadasyna joldama alý úshin bizdiń komandaǵa 4-12 oryn alǵandar qataryna ený kerek.
Eske sala keteıik, Katardaǵy álem chempıonatynda komandalyq esepte Qazaqstan namysyn Ilııas Azızov, Erbol Jantyqov, Mılad Karımı, Akım Mýsaev jáne Narıman Kýrbanov qorǵady.
Alty jattyǵý qorytyndysy boıynsha Qazaqstan komandasy jalpy esebi 239.291 upaı jınady. Qurama sportshylary qol tirep sekirýden eń joǵary upaı aldy – 41.532.
«Dohadaǵy álem chempıonatyna 67 memleketten 293 gımnast qatysty. Onyń ishinde 46 eldiń ókilderi tolyq qurammen kelgen. Álemdik doda 2020 jylǵy Olımpıada oıyndaryna alǵashqy joldamalardy taratty. Komandalyq básekede alǵashqy úsh oryndy ıemdengen komandalar tikeleı Tokıo lısenzııasyna ıe boldy. Al 4-24 oryndaǵy komandalar 2019 jyly Shtýtgardta ótetin lısenzııalyq álem chempıonatyna tolyq qurammen (5-6 sportshy) qatysýǵa múmkindik aldy. Bizdiń komandanyń aldyndaǵy basty mindet – alǵashqy 24 quramanyń qataryna ený edi. Biz bul talapty oryndadyq. Endi bıyl Shtýtgardta ótetin synda úzdik 12 komanda qataryna kirýge mindettimiz», - deıdi bas bapker Aleksandr Kım.
Narıman Kýrbanovtyń álem kýbogi kezeńderinde úzdik úshtikke enip, Mılad Karımıdiń birneshe jattyǵý boıynsha fınalǵa shyqqanyn eskersek, Tokıo Olımpıadasyndaǵy gımnastar dodasynan bizdiń sportshylardy kóremiz degen úmit basym.