Qostanaı oblystyq aýrýhanasynda «Endohırýrgııa mektebi» ótti. Oǵan sarapshylar – medısına ǵylymdarynyń doktory, professor, Qazaqstan hırýrgter qaýymdastyǵynyń, Qazaqstan endohırýrgter qaýymdastyǵynyń qurmetti múshesi, amerıkalyq «SAGES» gasteroenterologııalyq hırýrgter qaýymdastyǵynyń múshesi, «Alanda clinic» medısına ortalyǵy dırektorynyń klınıka boıynsha orynbasary Serik Toqpanov, medısına ǵylymdarynyń doktory, Astana medısına ýnıversıtetiniń professory, Qazaqstan endoskopııalyq hırýrgter qaýymdastyǵynyń prezıdenti, AMO endohırýrgııalyq qyzmetiniń jetekshisi, Aqtóbe qalasyndaǵy OBKA endoskopııalyq hırýrgııa bólimshesiniń meńgerýshisi, IPEG múshesi Vladımır Kotlobovskıı, joǵary sanatty hırýrg, Reprodýktıvti medısına ınstıtýtynyń bas dárigeri, gınekologııadaǵy endovıdeohırýrgııa boıynsha kýrs jetekshisi, Qoǵamdyq gınekologtar-endoskopshylar birlestiginiń vıse-prezıdenti Danııar Jaqypov qatysyp, oblys hırýrgterine «Endohırýrgııadaǵy qaýipsizdik negizderi» atty jalpy taqyrypta semınarlar ótkizdi.
Is-sharanyń ashylý saltanatynda oblystyq Densaýlyq saqtaý basqarmasynyń basshysy Vıacheslav Dýdnık endovıdeohırýrgııanyń damýymen Qazaqstanda medısına tarıhynyń jańa kezeńi bastalǵanyn aıtty.
«Biz densaýlyq saqtaý salasynda jańa tehnologııalardy barynsha engizemiz, elimizde joǵary bilikti mamandar daıarlaý úshin barlyq jaǵdaı jasalýda» dedi Vıacheslav Iýrevıch. Negizi búginde endoskopııalyq operasııa hırýrgııa salasynda beleń alyp keledi. Mundaı operasııalar tek oblys ortalyǵynda ǵana emes, Meńdiǵara, Áýlıekól sekildi oblystyń birneshe aýdanynda da jasalady. Degenmen, jańa zamanaýı medısınalyq jabdyqtar, tehnologııalardy engizý hırýrgterge qaýipsizdikti umytpaýdy talap etedi.
Professor Serik Toqpanov hırýrgterdiń ǵana emes, jalpy dárigerlerdiń basyn qosatyn mundaı sharalar jıi ótýi kerektigine mańyz berdi.
«О́ıtkeni qazir aýrýdyń bir-birimen baılanysyp jatatynyna medısınada mańyz beretin kez keldi. Sondyqtan hırýrgter medısınanyń bar salasyndaǵy dárigerlermen jıi aralasýy, pikirlesýi qajet-aq. Mysaly, óttegi tasty ÝZI-ge túsiredi, ol birde kishkene, birde zoraıyp kórinedi. Ol báribir erip, joq bolyp ketpeıdi, qur ásheıin dári de, ýaqyt ta shyǵyn bolady. Sol sııaqty hırýrgııalyq gasteroenterologııada da kóptegen másele bar. Dıagnostıkanyń durys bolmaýynan da kóptegen naýqas aýrýdyń zardabyn shegedi. Al hırýrgter men dárigerlerdiń bas qosýy, pikir almasýlary qatelikterdi azaıtady» dedi Serik Imaquly.
Professorlar qatysqan semınarlarda oblys dárigerleri, hırýrgteri birneshe taqyryp boıynsha pikir almasty, medısınadaǵy jańa tehnologııalar týraly sabaqtar tyńdady.
Názıra JÁRIMBET,
Egemen Qazaqstan
Qostanaı