At jaratyp, saıat quryp, týǵan topyraqtyń tereńine boılaǵan babalarymyzdyń rýhanı amanatynyń biri qusbegilik. Bul eshqandaı da áýesqoılyqtan týyndamaıtyn, bálkim urpaqtar sabaqtastyǵy arqyly beriletin bekzat óner.
Bul kúnde kópshilik qaýym moıynqumdyq qusbegi, etnograf, respýblıkalyq «Jiger» festıvaliniń laýreaty Japar Satylǵanovty jaqsy tanıdy. Belgili qusbegi 1981 jyly alǵash ret saıatshylyqpen aınalysýǵa baýlıtyn «Qaýyrsyn» atty búrkitshilerdiń mektep-klýbyn qurǵan bolatyn. Sonymen qatar, ózinen keıin de búrkitshilerdiń biraq býynyn tárbıelep, qalyptastyrdy.
Uzaq jylǵy eńbektiń nátıjesinde Japar Satylǵanovtyń esimi elimizdiń «KINES» rekordtar kitabyna endi. Redaksııa alqasy jerlesimizdiń tabıǵat janashyry ekenin jáne talaı jylǵy eńbegin eskerip, osynaý qurmetke laıyq dep tapqan.
Tanymal búrkitshiniń negizgi maqsaty – atyn shyǵarý emes, kerisinshe uly dalamyzda ǵasyrlar boıy qalyptasyp, ulttyq qundylyǵymyzǵa aınalyp ketken qusbegiliktiń qasıetin keıingi býynǵa nasıhattaý. «Bul eshqandaı da sport emes, bul bekzat óner. Ásirese, keıingi jas býyn osy máseleni tereń zerdelep, kókeılerine túıip alǵany abzal», deıdi ol. Jalpy, el biletin Satylǵanovtar áýletinde qusbegilik atadan balaǵa mıras bolyp kele jatqan óner. Sondyqtan da kánigi qusbegi jas kúninen beri bul amanatqa kózdiń qarashyǵyndaı qarap keledi.
Bir qyzyǵy, sonaý keńes ókimetiniń tusynda tıisti mekemeler Japar Satylǵanovtan «Rekordtar kitabyna» ený úshin málimetter alǵan eken. Alaıda sol bir alasapyran kezeńde bul jumys aıaqsyz qalady. Arada jyldar ótip, elimiz egemendik alyp, tól ónerimiz qaıta jańǵyrǵan ýaqytta onyń esimi elimizdiń rekordtar kitabyna enip otyr.
Hamıt ESAMAN,
«Egemen Qazagstan»
Jambyl oblysy