Petropavl halyqaralyq áýejaıynan Mysyr eliniń Sharm-El-Sheıh kýrortyna tikeleı áýe reısi ashyldy.
Bul jóninde oblystyq jolaýshylar tasymaly jáne avtomobıl joldary basqarmasynyń alqa otyrysynda belgili boldy.
Petropavl áýejaıynyń halyqaralyq mártebesi bolǵanymen, ushaqtar ázirshe Astana, Almaty, Shymkent shaharlarynan ǵana qatynaıdy. Byltyr áýejaıdyń qyzmetin 17 myńnan astam adam paıdalanǵan. Bul 2017 jylmen salystyrǵanda 13 paıyzǵa kóp.
«Áýe reısteriniń sanyn ulǵaıtý kerek. Baǵa qazir kóńilge qonymdy. Astanaǵa deıin bılet quny bar bolǵany 10 myń teńge turady. Jolaýshylardyń sany birshama ósti. Bul jumysty odan ári shıratýǵa tıispiz. Biz áýejaıdy basqarýdy jeke kompanııalar men sheteldik ınvestorlarǵa berýge ázirmiz», dedi alqa otyrysynda sóılegen sózinde aımaq basshysy Qumar Aqsaqalov.
Bıyl oblysta tanymal sheteldik kýrorttarǵa áýe reısterin ashý boıynsha júıeli sharalar atqarý belgilenip otyr. Sonyń bir mysaly joǵaryda sóz etkenimizdeı jazda soltústikqazaqstandyqtar Mysyr eliniń Sharm-El-Sheıh kýrortyna Petropavldan tikeleı ushý múmkindigine ıe bolady. Jolaýshylar tasymaly jáne avtomobıl joldary basqarmasynyń basshysy Vladımır Balahonsevtyń aıtýynsha, búgingi tańda Petropavl áýejaıy, «Skat» áýe kompanııasy men jergilikti týrfırmalar arasynda Sharm-El-Sheıh kýrortyna tikeleı áýe reısin ashý týraly kelisimge qol qoıylypty.
Ushaqtar shildeden qyrkúıekke deıin, ıaǵnı jaz aılarynda qatynaıtyn bolady. Búgingi kúni týrfırmalardyń biri Qyzyl teńiz jaǵalaýyndaǵy demalys oryndaryna bıletterdi brondap sata bastaǵan. 19 maýsymǵa josparlanǵan onkúndik demalys úsh juldyzdy qonaq úıde shamaman 222 myń teńge turady. Sharam-El-Sheıh kýrortyna dem alý úshin eń qymbat baǵa 343 myń teńgeni quraıdy. Buǵan ushý baǵasy, transfer, otelde turý jáne tolyq tamaqtaný kiredi.
О́mir ESQALI,
«Egemen Qazaqstan»