Aımaq basshysy Qumar Aqsaqalov Petropavl №2 jylý elektr ortalyǵynda bolyp, turǵyndardy jylýmen qamtamasyz etý barysymen tanysty.
«Tarıfti ınvestısııaǵa almastyrý» memlekettik baǵdarlamasy aıasynda aýqymdy sharalar atqarylǵanyn mekeme dırektory Vıktor Barmın aıtyp berdi.
4 qazandyq, 3 týrbına jańartylyp, 45 mıllıard teńge baǵyttaldy.
Jańǵyrtý jumystarynyń arqasynda stansııanyń elektrlik qýattylyǵy 380 MVt-tan 541 MVt-qa e deıin kóbeıdi. Energııa óndirý kórsetkishi jylyna shamamen 831 mln kVt quraıdy. Munyń ózi 103 myń tonna qatty otyn únemdeýge múmkindik berdi. Budan bólek, transformatorlar qalpyna keltirildi», dedi ol.
Bıyl energııany jyldam taratý maqsatymen ashyq taratý qurylǵysyn qaıta qurý jobasy júzege asyrylady. Búginde oblys tolyqqandy elektr energııasymen qamtamasyz etilip otyr. Sonymen qatar kórshiles aımaqtarǵa eksporttalatyn qýattyń da kólemi artty.
Qumar Aqsaqalov «Sevkazenergosbyt» seriktestiginde de boldy. Kompanııa bas dırektorynyń mindetin atqarýshy Maǵaýııa Saǵyndyqovtyń aıtýynsha, elektr qýatymen qamtý jaıly kelisim 1 kúnniń, jylý taratý boıynsha 5 kúnniń ishinde jasalady. Turǵyndardyń ótinishi eskerilip, «bir tereze» qyzmetiniń sany arttyrylypty.
Qumar Irgebaıuly kásiporyn dırektoryna elektrondy túrde tólem jasaý úrdisin damytý qajettigin aıtty. Sebebi, tutynýshylardyń 45 prosenti ortalyqqa kelip, qolma qol esep aıyrysady eken. Osynyń saldarynan kezek kútip qalý faktileri az kezdespeıdi.
«Mobıldik qosymshaǵa basymdyq berý kerek. Kıvı-qaltadan aqsha aýdarý isin de damytqan abzal» degen oblys ákimi Elbasy tapsyrmasy arqasynda tarıfterdiń tómendegenin atap kórsetti. Elektr energııasynyń tarıfi – 9,3, sýdyki – 9, kárizdik júıe – 3, gazben jabdyqtaý – 1,6, turmystyq qaldyqtardy shyǵarý 5 prosentke arzandaǵan. Demek jylyna turǵyndardyń 700 mıllıon teńgesi únemdeledi degen sóz.
О́mir ESQALI,
«Egemen Qazaqstan»
Soltústik Qazaqstan oblysy