Ulttyq kitaphanasynda dramatýrg, Eńbek sińirgen qaıratkeri, Qazaqstan jazýshylar odaǵy jáne Álem halyqtary jazýshylary odaǵynyń múshesi Ahmetjan Ashırıdiń 80-jyldyǵyna arnalǵan shyǵarmashylyq kesh ótti.
Ahmetjan Ashırı 1938 jyly 20 tamyzda Almaty oblysy Shelek aýdanynyń Malybaı aýylynda týǵan. Panfılov pedýchılıshesin, Qazaq memlekettik ýnıversıtetiniń fılologııa fakýltetin bitirgen. Y.Altynsarın atyndaǵy pedagogıkalyq ǵylymı-zertteý ınstıtýtynyń aspırantýrasynda bilim alǵan qalamger respýblıkalyq «Kommýnızm týǵı» gazeti ádebıet jáne óner bóliminiń meńgerýshisi, Qazaqstan Jazýshylar odaǵynyń janyndaǵy uıǵyr ádebıeti seksııasynyń jetekshisi, Qazaqstan Jazýshylar odaǵynyń hatshysy boldy. Kórkem shyǵarmamen 1956 jyldan aınalysa bastaıdy.
Alǵashqy áńgimeleri «Tańǵy samal», «Qıly adamdar» jınaǵyna endi. Al 1965 jyly aýyl jastarynyń ómirine arnalǵan «Osylaı ómir súrgim keledi» tuńǵysh povesi jaryq kórdi. Shyǵarmalary orys, qazaq, ózbek, ýkraın, qyrǵyz tilderine aýdarylǵan. «О́lmeıtinder», «Mýqamshy», «Dıqan», «Idıqut» pesalary respýblıkalyq uıǵyr mýzykalyq komedııa teatrynda qoıylyp keledi.
«Eńbekte úzdik shyqqany úshin» jáne «Astana» medalimen, Qazaq KSR-niń Qurmet gramotasymen marapattalǵan. «Ilham» Halyqaralyq syılyǵynyń laýraety, Almaty oblysy Eńbekshiqazaq aýdanynyń Qurmetti azamaty.
Sharany aqyn, Qazaqstan jazýshylar odaǵynyń múshesi Dáýletbek Baıtursynuly júrgizdi. Is-sharaǵa Baýyrjan Jaqyp, Sultanáli Balǵabaev, Janarbek Áshimjan, Ahmetjan Shardınov, Nurdáýlet Aqyshev, Álimjan Tileýaldy, Rafael Nııazbek, Temirhan Tebegenov, Qaırat Dúısen jáne t.b. qoǵam qaıratkerleri qatysyp, sóz sóıledi.
Is-shara barysynda QR Ulttyq kitaphanasynyń dırektory Janat Seıdýmanov ashyp, A.Ashırıge «vip» oqyrman bıletin tabystady.
Keshte uıǵyr tilinde ánder oryndalyp, A.Ashırıge arnalǵan vıdeo fılm kórsetildi. Sondaı-aq oqyrman qaýymnyń nazaryna QR Ulttyq kitaphanasynyń qorynan jazýshynyń ómiri men shyǵarmashylyǵyna arnalǵan kórme uıymdastyryldy.
Elvıra SERIKQYZY,
«Eqemen Qazaqstan»
ALMATY